No.3681/2021-2022
Aizawl, the 15th January, 2022: Special Summary Revision of Photo Electoral Roll 2022 neih zawh tak hmanga Electoral Roll thar ber, Final Electoral Roll 2022 buatsaih chu vawiin chawhma dar 10:00 khan Champhai DC Conference Hall-ah District Election Officer Pi Maria C.T. Zuali chuan a tlangzarh. Tlangzarh hnu hian Political Party aiawhte hnenah Final Electoral Roll copy khat theuh a hlan nghal a ni.
District Election Officer Pi Maria C.T. Zuali chuan Electoral Roll tlangzarhna hun hriatpui tura kalkhawmte chungah lawmthu sawiin, mipui thlan sawrkar democracy ramah inthlanna felfai taka neih a nih theihna tura pawimawh tak Electoral Roll a hun taka peihfel a ni chu lawmawm a tih thu a sawi a. Champhai District pum anga thlira mipa voter an tlem chu thanharhna tur leh inenfiahna tham a ni, a ti a. Ram inrelbawlna kawngah Political party, NGO leh khawtlang hruaituten mawhphurhna sang tak an neih avangin Roll bu dik leh felfai tak buatsaih mai bakah, thenfai leh tihthianghlim kawnga thawhhopuiah a sawm a. Electoral Roll a luh leh thil dang buaipui kawnga document tangkaite mamawh huna phawrh mai theiha a awm theih nana felfai taka vawng thin turin mipuite a chah a ni.
He hunah hian Pu Lalnunfela Chawngthu, Election Officer chuan Electoral Roll tlangzarh tak dinhmun tlangpui a tarlang a. A hun taka Electoral Roll thar ber peihfel a nih theihna tura ERO, AERO, Election Office Staff leh BLO zawng zawngte thahnemngaihna chu fakawm a tih thu sawiin, anmahni tawiawma lo pui thintu NGO, khawtlang hruaitu leh Political party aiawhte chungah pawh lawmthu a sawi a. Electoral Roll-a inziahluh nana document rintlak ber birth certificate ngaihpawimawh a tul thu leh birth certificate dil tlai thin an awm chu veiawm a tih thu sawiin, pian hlimchhawnah mahni bialtu Registrar of Birth and Death (RBD) te kaltlanga inziahluh ngaipawimawh theuh turin nu leh pate a chah a. Nakin lawka harsatna tawh loh nan a hun taka birth certificate ngaihvena midangte hrilh chhawng thintu ni turin kalkhawmte a chah bawk.
Special Summary Revision of Photo Electoral Roll 2022 kaltlanga buatsaih Final Electoral Roll 2022 tlangzarh takin a tarlan danin Champhai District chhunga Assembly Constituency 3; 23-Champhai North AC, 24-Champhai South A/C leh 25-East Tuipui A/C chhungah vote nei mi 55357 (mipa 27052 leh hmeichhia 28305) an awm mek a, mipa voter aiin hmeichhe voter 1253 in an tam zawk a ni. Heng bakah hian Service voter 449 (mipa vek) an awm bawk. Form 6 kaltlangin Electoral Roll-a ziahluh thar mi 1978 (mipa 950 leh hmeichhia 1028) an awm a. Form 7 kaltlangin chhan hrang hrang vangin Roll-a chuang tawh mi 798 (mitthi- 443, hmun danga insawn 346 leh Roll-a awm nawn 9) te paih an ni bawk.
Assembly Constituency zingah 24-Champhai South A/C ah vote nei mi 20254 (mipa 9709 leh hmeichhia 10545) awmin an tam ber a, 23-Champhai North A/C in dawtin vote nei mi 19577 (mipa 9526 leh hmeichhia 10051) awmin an dawt a, 25-E.Tuipui A/C-ah voter 15526 (mipa 7817 leh hmeichhia 7709) awmin vote nei awm tlemna ber a ni. Champhai North A/C leh Champhai South A/C ahte mipa voter aiin hmeichhe voter an awm tam zawk a ni.
Electoral Draft Roll, 2022, November ni 1, 2021 a tlangzarh taka vote awm 54177 atangin Final Roll-ah vote nei thar mi 1180 an awm belh a, a punna hi za zela 2.18 (2.18%) a ni. 24-Champhai South A/C ah vote punna hi sang berin za zela 3.22 a ni a, vote nei thar bakah hmun dang atanga vote nei tawhsa pem lut an tam vang a ni. A punna hi za zela 3 (3%) aia a san avangin ECI hnenah sawifiahna siam a ni. 23-Champhai North A/C in dawtin za zela 1.83 in a pung a, 25-East Tuipui A/C ah vote punna tlem berin za zela 1.29 in a pung a ni.
Attachment
- Loading attachment...
