No.3682/2021-2022
Aizawl, the 15th January, 2022:  Tukin khan Deputy Chief Minister Pu Tawnluia'n  Integrated Command and Control Centre for Aizawl Smart City Limited chu Old Secretariat Building-ah tlawhin, CEO Pu Lalrothanga chuan a lo dawngsawng a ni.

Integrated Command and Control Centre for Aizawl Smart City Limited hi khawl thluak nei, Indian ram chhunga khawpui 100 a Smart City Project a lo hlawhtlin theih nana hmalakna a ni a. Sawrkar laipuiin MoU a neih pui BEL India te nena tangkawpa khawl bun a ni a. Trinity Consultant Firm chuan a enkawl hna, leh technical assistance hi kum 5 chhung an pe dawn a ni.

Integrated Command and Control Centre hi khawpui chhung a administration tha fel fai thlen tir tura data feed tu khawl lian leh Decision Support System (DSS) a ni a. Khawpui chhunga traffic management, khawpui him zawkna (safety and security), Information & response, leh sawrkar rules and regulations chungchanga mipuite zirtirna thlen tu a ni dawn a.  He project hian ken tel hrang hrang Video Wall Displays, Contact/ Call Centre, War Room, Data Centre, Disaster Recovery Centre, Message Display, Intelligence Surveillance System, Face Recognition System, Automatic Number Plate Recognition leh a dangte a keng tel a. Heng bakah hian AMC huam chhunga Solid Waste Management System ti changtlung turin bawlhhlawh paih dan leh bawlhlawh paih motor te real time monitoring tih theih a ni dawn bawk a ni.