No.3683/2021-2022

Dated Aizawl, the 15th January, 2022: Vawiin khan Serchhip District Election Officer Pu Kumar Abhishek, IAS chuan Special Summary Revision of Electoral Roll, 2022 Final chu Serchhip DC Meeting Hall-ah a tlangzarh.

Thusawiin Pu Kumar Abhishek chuan Electoral Roll thar tlangzarh theiha a awm leh ta chu lawmawm a tih thu a sawi a, Roll felfai leh thianghlim tak a awm theih nana thawktu zawng zawng BLO, Election Branch, ERO, AERO leh khawtlang hruaitu, Political Party leh tlawmngai pawl zawng zawng te chungah lawmthu a sawi a. Ram hruaitute thlang thin ram kan nih avangin khua leh tui dik tak te Electoral Roll-a kokim taka kan chuan hi democracy innghahna pawimawh a tlin avangin a hlu em em a ni, a ti. Tlangzarhna a neih zawh hian Electoral Roll hi Political Party hrang hrang aiawh lo kalkhawm te a hlan nghal a ni.

He hunah hian Pi Lalrinchhani Ralte, Election Officer chuan Electoral Roll thar dinhmun tlangpui tarlanna a nei a. Serchhip District Electoral Roll thar dinhmun tlangpui chu hetiang hi a ni :

Voters awm zawng zawng hi 53,372 a ni a, an zinga 27,217 hi hmeichhia niin a dang 26,155 te hi mipa an ni. 26-Serchhip AC ah Voters 19,922 awmin an zinga 10,554 te hi hmeichhia an ni a, a dang 9368 te hi mipa an ni. 27-Tuikum AC-a voters awm zawng zawng zat chu 16,576 an ni a, an zinga 8351 hi hmeichhia niin mipa 8225 an awm a, 28-Hrangturzo AC-ah voters 16,454 awmin an zinga 8308 te chu hmeichhia an ni a, mipa voters hi 8146 an awm thung. Serchhip District chhunga Constituency pathum ah hian hmeichhe voters an tam zawk vek a, Gender Ratio hi 1057 a ni.

Mipui tam lam atanga teha voters awm zat (Ratio of Electors to population) hi 26-Serchhip ah 660 niin 27-Tuikum-ah 606 a ni a, 28-Hrangturzo ah 614 niin District pumpui dinhmun chu 628 a ni. Tun tum Special Summary Revision neih chhunga za zela bial tin te punna hi 26-Serchhip ah 1.95 niin 27-Tuikum ah 1.77 a ni a, 28-Hrangturzo ah 2.16 a ni thung. Tihian District pumpui za zela punna chu 1.96 a ni. Electoral Roll thar tlangzarh a nih hnu hian kum 18 tling chin te tan chuan hming thun thar (Contineous Updation) hi kalpui chhunzawm reng theih a ni ang.

Final Roll tlangzarhna ah hian Pu Lalmuansanga Ralte, Dy. DEO, Pu Amol Srivastava, ERO Serchhip, Pi C. Laltleipuii, ERO Tuikum, Pu Asvin Chandu A, ERO Hrangturzo, Political Party hrang hrang aiawhte, tlawmngai pawl aiawh te leh MJA te an tel a ni.