No.3684/2021-2022

Aizawl, the 15th January, 2022: Vawiin chawhma dar 11:00 khan Khawzawl District Bawrhsap Pu C.C. Lalchhuangkima, District Election Officer (DEO) ni bawk chuan DC Conference Hall-ah Tuichang Assembly Constituency Electoral Roll thar ber a tlangzarh. Electoral Roll thar ber hi Political Party aiawhte kutah a hlan nghal a ni.

Khawzawl District Bawrhsap chuan thu sawiin, Electoral Roll siamthat hna chu Election Commission of India ruahmanna hnuaia Special Summary Revision of Photo Electoral Roll, 2022 kaltlanga neih a ni, a ti a. Roll siamthat hna thawh a nih chhunga Electoral Roll Observer-in a rawn tlawh avangte, political party hrang hrang leh tlawmngai pawl hrang hrang ten tha taka an thawhpui thin avangtein lawmthu a sawi a. Hmun thenkhatah Electoral Roll siamthat hna thawh a nih laiin harsatna thleng a awm fo thin thu sawiin, harsatna tawk lova Khawzawl District chhunga Roll siamthat hna zawh fel theih a ni chu lawmawm a tih thu a sawi bawk. 

Electoral Roll tlangzarhna hunah hian Pu Lalrohlua, Additional DC pawhin tun aia
Electoral Roll a inthun ngaihven lehzual a tul tih sawiin, Vote nei tharte leh hmundang atanga rawn pem tharte Roll-a an inziahluh vat theihna tur hrilhhriat leh hmalakpui kawngah Election Official-te thawhpui zel turin political party aiawhte a sawm nghal a ni.

Pu James Lalnithanga, SDO (Sadar) & Electoral Registration Officer (ERO) in Roll tlangzarh report a pek tarlan dan chuan Khawzawl District Election Officer enkawl huam chhungah 22-Tuichang Assembly Constituency awmin, Electoral Roll thar berah hian vote nei mipa 8624 leh hmeichhia 8626, an vaiin mi 17250 an awm a. Khawzawl khawpui bikah voter 8181 awmin, Khawzawl khawpui pawna vote nei awm zat chu 9069 a ni. Tuichang AC ah hian polling station 28 awmin, voter 1026 awmna Khawzawl Vengthar North chu voter tamna ber a ni a. Voter tlemna ber Arro khuaah voter 115 an awm thung a ni.

Summary Roll Revision, 2022 ah hian vote nei thar leh constituency dang atanga rawn insawn mi 535 awmin chhan hrang hrang avangin mi 253 chu Roll atanga paih an ni a. Voter punna hi 282 niin, chu chu vote nei zawng zawng atanga 1.6% a ni.

Vawiina Tuichang AC Final Electoral Roll, 2022 tlangzarhnaah hian Political party aiawhte, YMA, MHIP, MUP leh MJA aiawhte an tel a ni.