No.3685/2021-2022
Aizawl Pawlkut thla ni 15, 2022: Nimin khan Lawngtlai DC Conference Hall-ah Azadi Ka Amrit Mahotsav - New India @75 lawmna peng khat atan "Ngawr natna chungchang zir hona" (TB Awareness Campaign) buatsaih a ni.
He hun hmanpuitu Lawngtlai District TB (Tuberculosis) Forum {DTF} Chairman, Lawngtlai Bawrhsap Dr Andrew H. Vanlaldika chuan hmanlai chuan ngawr (TB) chu natna tihdam theih loh, thihpui ngei ngei tura ngaih a ni thin a, tunah erawh TB chu a hun taka a dan dik taka enkawl chuan thihpui loh tura ngaih a ni tawh tih sawiin, Lawngtlai District-ah TB natna um bo a nih theih nan a thawktute bakah, tlawmngai pawl leh mipuite tan rual a pawimawh hle tih a sawi a. Zau zawka TB chungchang inzirtir a, khawtlanga TB veite thinhrikna awm thin te pawh tibo tura theih tawpa hma lak chhunzawm a tul a ni, a ti.
He hun hi Chief Medical Officer Dr LP Malsawma'n kaihruaiin, hun hman chhan a sawi fiah a. Sr Treatment Supervisor Pu James Zarzoliana'n National TB Elimination Programme (NTEP) tihlawhtling tura Lawngtlai District-a hma lakna tlangpui tar langin, NTEP a hlawhtlin theihna tur leh TB um bona kawnga Lawngtlai District chhunga hma lakna tur hrang hrangte sawi ho nghal a ni.
India ramah kum 1962 atang khan National TB Control Programme (NTCP) hnuaiah TB khuahkhirh tura hma lakna kalpui niin, kum 2003 atangin Revised National TB Control Programme (RNTCP) hnuaiah ngawrh zawka hma lak a ni a. National TB Elimination Programme (NTEP) hnuaiah kum 2025-ah chuan India ram atanga TB um bo a nih theih nan beihpui thlak mek a ni.
Lawngtlai District-ah TB vei hmuh chhuah kum 2015-ah mi 111, kum 2016-ah mi 104, kum 2017-ah mi 112, kum 2018-ah mi 118, kum 2019-ah mi 128, kum 2020-ah mi 94 leh kum 2021-ah mi 72 an awm a. Kum 2015-ah enkawl dam mi 104 leh thihpui mi 4, kum 2016-ah enkawl dam mi 99 leh thihpui mi 4, kum 2017-ah enkawl dam mi 109 leh thihpui mi 1, kum 2018-ah enkawl dam mi 116 leh thihpui mi 1, kum 2019-ah enkawl dam mi 127 leh thihpui mi 1 leh kum 2020-ah enkawl dam mi 90 leh thihpui mi 2 an awm a. Kum 2021 chhung khan enkawl dam mi 38 awmin, thihpui an awm lo va, tunah enkawl lai mek mi 34 an la awm a ni.
TB damdawi ei that loh vang leh chhan dang vanga damdawiin hna a thawh that theih lohna Multidrug Resistant TB (MDR-TB) damlo Lawngtlai District-a mi 11 hmuh chhuah tawhah mi 10 chu enkawl dam tawh niin, mi 1-in a thihpui a ni.
District TB official-te chuan TB hrik en leh damlo enkawlna chu sawrkarah a thlawn vek a nih bakah, damdawi ei chhung (thla ruk chhung) zawng thla tin Rs 500/- pek an nih thu leh inenkawl zawh hnuah Rs 750/- pek thin an nih thu sawiin, TB chu enkawl hma a, tha taka damdawi ei chuan a dam hma a, harsatna nasa zawk a pumpelh theih tih an sawi.
TB hi chuap TB (pulmonary) leh chuap pawn lam TB (extra pulmonary) tiin hlawm 2-a thliar a ni a. Chuap TB, an khaka hrik hmuhte chauhvin mi dang kai chhawng theia ngaih niin, he'ngte pawh hian ni 10-14 chhung damdawi an ei hnu chuan mi dang kai chhawng thei tawh lo tura ngaih a ni a. TB veite thinhrikna awm thin chu hriat chian tawk loh vang a ni tih thu he hunah hian tar lan a ni.
Attachment
- Loading attachment...
