No.3686/2021-2022 

Aizawl, 15^th January, 2022 : Vawiin khan Health Minister Dr. R. Lalthangliana hovin SAD Conference Hall, MINECO-ah Mizoram COVID-19 dinhmun thlirho a ni a, he hunah hian Home Minister Pu Lalchamliana, MOT Chairman Dr ZR Thiamsanga, Commerce & Industries Development Board Vice Chairman Pu K. Laldawngliana, MLA , Chief Secretary Dr Renu Sharma, Finance Commissioner Pu Vanlalchhuanga, Planning Secretary Pu Lalmalsawma Pachuau, DM&R Secretary Pu Vanlalngaihsaka, Health Secretary Pu R. Lalramnghaka bakah Aizawl bawrhsap,  DM & R, Health Department, DIPR, Home, ZMC, Mizoram State Commission for Protection of Child Rights hotute telin, MIMA, MBCC, IMA, MOT, MKHC, CYMA  leh Aizawl City Local Council Association aiawhte an tel bawk a ni.

Vawiin meetingah hian Mizorama nitinin hri kai thar zat tunhnai kar hnih chhungin 15% - 20% inkarah a awm leh tak avangin kan dinhmun a thlamuanthlak loh thu tarlan a  ni a, inkaihhruaina thar a hma aia khauh deuh zawk a duan chu kar khat vel kan hmang leh tawh a, a aia khauh lehzuala kal hi phurrit a nih thin avangin a pumpelh nan mitinin SOP kan zawm that a, COVID Appropriate Behaviour kan zawm uluk a tul tih sawi a ni. Mizo zingah co-morbid condition (zunthlum, thisen sang etc) nei kan tam avangin kan fimkhur a ngai takzet tih an sawi a ni a, co-morbid nih in hre lo, hri an kai hnu a inhrechhuak an tam thu sawiin mitinin mahni hriselna dinhmun kan chik a tul a, co-morbid te zawn chhuah hma a pawimawh hle tih sawi a ni bawk.

Vawiin meetingah hian COVID-19 hri kai nunna chan mi 383 te sawrkar laipui thuchhuak angin ralna sum fai Rs. 50,000/- theuh an chhungte hlan a nih tawh thu tarlan a ni a, midangte pawh pek chhuah leh turin buaipui mek a ni. Task Group on Insurance hnuaiah VLTF/LLTF COVID-19 hri dona kawnga fehchhuakte zinga nunna chan mi 2 ralna tur Rs nuaih 20 ve ve chu sanction a ni tawh a, midang 1 ralna tur buaipui leh mek a ni.

Meetingah hian dawr hawn dan tur chungchangte, zan inkhawm chungchangte leh inkhawmna a him taka zaiho theih dan tur chungchanga rawtna te sawiho a ni a, ruihhlo ngai quarantine tulte buaipui dan tur leh Task Force siam that dan tura rawtnate sawiho a ni bawk a ni.

Mipuite hnenah uar lehzuala inzirtirna kalpui a tul thu tarlan a ni a, hmalak dan tur hrang hrangte sawiho niin mask vuah uar tura Mizoram puma nasa lehzuala tan lak a tul thu sawi a ni. CAB tha taka zawm a nih theih nan helam thlurbing tu committee emaw, team emaw din a that thu tarlana  ni bawk.

Hripui leng boruak enin District hospital zawng zawngah ICU khum dah a tul thu leh hemi atana hmalak ngaite sawi lan niin, naupangte pual bik PICU/NICU chungchang pawh sawiho a ni a. Temporary Hospital siam dan tur ngaihtuaha kawng hrang hrang dap mek a nih thu tarlan a ni bawk.

Mobile RT-PCR Van Mizoram sawrkarin a dawn Bhubaneswar-a an siam pawh rawn chhuak tawhin Mizoram rawn pan pui mek a nih thu meetingah hian tarlan a ni a, Lunglei-a RT-PCR laboratory pawh ICMR in a rawn approve tawh thu tarlan a ni.

IDSP Nodal officer Dr Pachuau Lalmalsawma report danin tunhnaiah Foreign atanga rawn haw mi 242 an awm tawh a, foreign atanga rawn hawte hi ni 7 quarantine hnuah RT-PCR hmanga sample test sak an ni a, positive 16 hmuhchhuah tawh niin sample test hmabak mi 29 an la awm a, positive te sample Genomic Sequencing tura thawn tawh zinga OMICRON hmuh a la ni lo. Tunhnaia Mizoram pawn atanga rawn lut zingah chawhrualin nitin COVID-19 positive 38 hmuhchhuah ang a ni.

Mega Kiosk, Vanapa Hall-a bun mek chu tul zawkna avangin hmun danga sawn chhuah tum a ni a, a hmun tur dap mek niin, RAgT leh FIA sample test theihna a ni a, RT-PCR sample lak theihna tura duan tum a ni. Karleh thawhtanni atang hian AMC area hmun hrang hrangah random testing kalpui tuma nih thu tarlan a ni bawk.

COVID-19 vaccine hi Mizoramah chuan dose 13,80,130 pek chhuah tawh a ni a, 1st dose la hi 95.5% ni tawhin full dose la hi 79% an ni. Kumin January ni 3 atang khan kum 15 – 17 inkarte tan COVID-19 vaccine “COVAXIN” pekchhuah tan niin, pek tur zat ruahman mi 67,000 atangin mi 38,409 in 1^st dose an la tawh a, ni 28 hnuah 2^nd dose pek leh tur an ni. Precautionary dose hi Healthcare Workers, Frontline Workers leh kum 60 chunglam natna benvawn nei, an daktawr ten la tura an tih te hnenah Janury ni 10 atang khan pek chhuah a ni a, mi 5480 hnenah pekchhuah tawh niin, precautionary dose hi 2^nd dose lak atanga thla 9 hnuah lak leh tur a ni.