4381/2025-2026

Champhai, dated 10th February 2026: Vawiin khan District Level Fire Prevention Committee kaihhruainain DIET Champhaiah Fire Prevention Week 2026 chu "Nungchate chenna leh tui thianghlim min petu ramngaw kangmei lakah venghim rawh" tih thupui hmangin hawn a ni a, hawnna hunah hian Addl. DC Pu James Lalnithanga chu khuallian a ni.

Khuallian Pu James Lalnithanga chuan kang mei venna haptaah hian ramngaw venhim hi a pawimawh em em a, khawvel tana chuap an lo tih thin a nihna angin kan tana thil tam tak a siam thu a sawi a. Kang mei chhuah chhan hrang hrang te hi fimkhur loh vang a ni duh em em a, mitin hi kan nitin nunah fimkhur a ngai a ni tih a sawi. Leimin a tam phah a, tuihna a tlem phah a, nungcha tan thihna leh hrehawmna a ni a, mihring hriselna a nghawng bawk tih sawiin kang mei tlem nana hma la zel turin a chah a, sawrkar mawhphurhna chauh ni loin mitin mawhphurhna a ni tih a sawi. Mimal atanga chhungkua, khawtlang leh ram angin kan tanrual chuan kang mei hi kan ti tlem thei ngei ang tih a sawi a ni.

He hun hi Champhai Honorary Wildlife Warden Pi Lalrammawii chuan a kaihruai a, DFO leh District Level Fire Prevention Committee Member Secretary ni bawk Pu Lalbiakchama Chawngthu chuan Mizorama ramngaw dinhmun leh Fire Prevention Committee din dan chungchang te a sawi. Govt. Champhai College Asst. Professor Pi Rosangzuali Varte chuan ram kang leh a thlen chhan te, a nghawng te a sawi a, Fire Prevention Week puala thutiam sawiho chu MHIP Sub Hqtrs Champhaiin an kaihruai a ni.