Vawiin khan District Fisheries Development Office, Champhai buatsaihin kum 2017-2018 chhunga Central Scheme, Blue Revolution kaltlangin Beneficiary thlan bik mi 144-te hnenah Sangha chaw leh chinai thi (Slake lime)  semchhuahna Fisheries Godown, Champhai Vengthar-ah neih a ni. Blue Revolution Scheme hnuaiah hian Dil thar laitu mi 46 leh Dil neisa mi 98-te tan thawmthatna pawisa fai pek an ni a, hemi baka an dawn leh tura ruahman sangha chaw leh Chinai thite chu an hnathawh zawh dan ang zelin pekchhuah a ni.

He hunah hian Pi Lucy Lalrinpuii, District Fisheries Development Officer, Champhai chuan Champhai District chu Sangha to berna District anih avangin Sangha tam zawk leh tlawm zawk tharchhuak tura tan lak angaih thu a sawi a. Mipuite banphaka Sangha hrisel leh man tlawm zawk chhawpchhuah sak anih  theihna turin Blue Revolution Scheme hnuaiah hmalak mek anih thu  a sawi a. District chhunga Sangha khawi beneficiary-ten tihtak zetin Department-in tih tur a sawite an thawh thin thu leh an thahnemngaihna chu fakawm a tih thu a sawi a. Hmalakna reng rengte chu GPS hmanga chhui niin sawrkar laipuiah thawnthlak zel anih  avangin theihtawp chhuah angai a ni, a ti a. Tanpuina an dawnte chu anih dan tur ang taka hmanga District-in Sangha tam zawk leh hrisel zawk a thar chhuah ngei theihna tura tan la zel turin a chah a. Harsatna an neih reng rengin Fisheries Department-ah thlen zel tura hrilhin, puih an ngaihnaah chuan Department-in a pui zel dawn a ni, a ti a. Sangha tam leh hrisel thar chhuak thei tur chuan Dil enkawl that, Sangha chaw pek that leh an hriselna ngaihpawimawhte a tul thu a sawi a.Sangha khawitu kalkhawmte chu Sangha thar chhuak tam ber leh Intodelh District ni ngei thei tura tan la turin a chah nghal bawk a ni.

Blue Revolution hmang hian Sangha tam zawk leh hrisel zawk tharchhuah tum niin India ram chu Sangha Intodelh rama siam tum a ni a. Hmalakna kalzelah vawiin hian Sangha Chaw leh Dil buatsaihna tur Chinai thite sem chhuah niin Sangha note pawh semchhuah leh thuai tum a ni.

Blue Revolution Scheme hmang hian Champhai District chhunga khaw hrang hrang; N.Khawbung, Hmunhmeltha, Zote, Chhungte, Farkawn, Dungtlang, Samthang, Kelkang, Khawbung, Khuangleng, Leisenzo, Khawzawl, Neihdawn, Khawhai, Sialhawk, Ngopa, Hliappui, Chiahpui, Khawdungsei, Kawlbem, Pawlrang leh Champhai veng thenkhata Sangha khawitu thlan bikte tan tanpuina hi pek a ni.