Vawiin khan Mizoram State Sport Council hmalakna a buatsaih, Sport Centre Phulpui-ah hawnna hun hman a ni a, he hunah hian Agriculture Minister Pu K.S.Thanga chu Khuallian niin Sports and Youth Services Secretary Pu Lalthangpuia Sailo, IAS chu Khual Zahawm a ni a, Mizoram State Sports Council Secretary Pu C.Laltlanthanga'n Sport Centre hawnna hun hi kaihruaiin  Sports and Youth Services Director te bakah khawtlang hruaitute leh mipui thahnem tak he hunah hian an tel a ni.

Agriculture Minister Pu K.S.Thanga chuan mizo footballer te chu Indian Super League leh league hrang hrang khelh thinah te an che tha hle a, mizo thalai te hian inkhelhna lamah chuan hun tha kan tawng chho mek a ni, a ti a, Sawrkar hian enzawnna tlak a inkhel thiam tam zawk chherchhuah a duh a, hemi kawngah hian tan pawh ala nasa hle a, India football kan sawi chuan Mizoram tel lovin a sawi theih tawh meuh lo a ni, a ti bawk. Pu K.S.Thanga chuan thalaite infiamna a hmasawn tur chuan taimakna, inpekna leh mahni inthunun theihna a tul hle a ni, a ti a, Sport centre chu Phulpui leh a chhehvel khuate inhmantawm tur anih avangin Phulpui leh a khaw thenawmte an inpumkhatnan leh thawhhona tha alo awm zelna turin duhsakna a hlan bawk.

Sport Centre hawnna hunah hian Technical report te ngaihthlak niin thalai infiam mite fuihna thu Sports and Youth Services Secretary Pu Lalthangpuia Sailo, IAS leh Director Pu Zothanmawia MCS te atangin ngaihthlak a ni a. Minister Pu K.S.Thanga'n Phulpui Village Council President hnenah Sport Centre hlanna hun neiin infiamna bungrua engemawzah a hlan nghal bawk. He hunah hian MLA Cup 2018 ngaihthlak niin North Lungleng leh Aibawk te inkhel thlir ho a ni bawk.

 Sport Centre, Phulpui hi NEC atanga sum hmuh, cheng nuai 394 hmangin July 2012 khan sak tan a ni a, Pavilion, Indoor stadium, Basketball Court, Volleyball Court, Football ground, Water tank leh approach road te siam niin, Retaining wall, Breast wall, Drain leh Culvert te siam a ni bawk.

Attachment

  • Loading attachment...