Vawiin chawhma khan Lal Thanhawla  Auditorium-ah Finance, Planning etc. Minister Pu Lalsawta hovin Mizoram Journalists’ Association (MJA) chuan an General Conference vawi 45-na an hmang.

Khuallian Pu Lalsawta chuan Mizoramin hmalam a pan zelnaah MJA  chu a pawimawh berte zinga mi an ni, tiin ram tana thahnemngai taka thawk zel turin a chah a. Rilru hahdam lai leh thil dangin min tihbuai loh lai taka kan chhiar thin chu chanchinbu a ni tiin mi rilru chanchinbu hmangin in hneh thin a ni, a ti a. Chanchinbu hmanga ram rawng in bawlna hi a ziaktute leh a buaipuitute hriat phak bakin in thil chhuah hian hna a thawk thei a ni, a ti a. He ziak rawngbawlna avang hian ram leh hnam tan hna in thawk thui hle a ni, a ti a. Chanchinbu-a chhuah awm leh awmloh thliar thiam turin a fuih a. Inthlan hun hlawhtling taka an hman theih nan duhsakna a hlan nghal bawk a ni.

MJA President Pu Vanlalrema Vantawl chuan thu sawiin khawvel thang zelah media chuan a lailum a luah zel dawn a ni, tiin journalist-te chu sawrkar mit leh bengte an ni, a ti a. MJA siamthat chungchang,  MJA library thuamthatte leh hmalakna hrang hrang bakah an harsatnate a tarlang a. Journalist-te chu mahni thiamna subject bika report pek intihhmuh a hun tawh thu sawiin environment news, business news leh a dangte puala news chhuaha, helam hawi zawnga mipui rilru hruai hian ram leh hnam tan pawh thanna a awm ngei a beisei thu a sawi bawk.

Vawiin vek hian MJA member pathum Pu DR Zirliana (Mizo Aw), Pu V. Lallianzuala (Lairam) leh Pu K. Thangvela (Zobawm) te chu Prominent Journalist-ah puan an ni a. Prominent Journalist ni mekte hi Pu C. Lalkhawliana (Highlander), Pu Lalbiakthanga Pachuau (Zoram Tlangau)leh Pu S. Lalhmachhuana (Turnipui) te an ni. Prominent Journalist-te hi kum 60 aia naupang lo leh khaihlak awm miah lova MJA member kum 30 chhung ni tawhte an ni. Mizoram pumah MJA member mi 194 awmin General Headquarters-94,Champhai-15, Kolasib-14, Lawngtlai-9, Lunglei-26, Mamit-12, Serchhip-12 leh Siaha-12 an ni.

MJA Vice President Pu Zonunsanga Khiangte chuan programme kaihruaiin Publicity Secretary Pu Zohmingmawia chuan palai lawmna leh inhmelhriattirna hun a hmang a. Welfare Secretary Pu Lalremsiama hovin  kum kalta chhunga MJA member boralte sunna hun hman a ni a. General report leh Financial report General Secretary Pu C. Lalhmachhuana leh Treasurer Pu R. Lalhmangaihzuala atangin ngaihthlak a ni a. Prominent Journalist puanna leh citation hlanna hun neih a nih bakah Himalayan States Media Futsal Tournament ,February Ni 1-4, 2018 chhunga neih taka MJA champion team memberte chawimawina citation hlan an ni bawk. Organisation Secretary Pu Lal Rinmawia chuan lawmthu sawina in hun a khar a. Chawhnu lamah MJA OB member inthlan leh rorel in a chhunzawm dawn a ni.

MJA OB member thlan tharte chu:

President: Pu Zonunsanga Khiangte (Lenlaini)

Vice President: Pu R. Lalhmangaihzuala (Romei)

Treasurer: Pu Lalremsiama (Zawlkhawpui)

Anni bakah hian chuhtu awm lovin Executive member atan mi 11 tlinga puan an ni.