4141/2023-2024

Champhai, the 13th March, 2024 : General Election to Lok Sabha 2024 atana inpuahchahna kalpui mek zelah vawiin chawhma dar 11:00 khan District Election Office, Champhai buatsaihin election kaihhnawih senso hrang hrang hman dan viltu, election expenditure monitoring hnuaia peng hrang hrang Flying Squad (FS), Static Surveillance Team (SST), Video Surveillance Team (VST) leh Excise & Narcotics Team-te pualin DC Conference Hall-ah training neih a ni.

He hun hmanpuitu Pu James Lalrinchhana, District Election Officer, Champhai District chuan election-ah thil thar a awm zel thu leh intuaithar ve zel a tul thu sawiin, election hnuaia hmalakna reng rengte chu tunhma lo tih tawh dan ang tura ngai mai lo tur leh palzam mai mai lo turin kalkhawmte a chah a. Election buaipuitute chu training mamawh vek an nih thu sawiin, team hrang hrang hnuaia mawhphurhna neite chu zirlai rilru pu chunga training hlawkpui theuh tum turin a fuih a. Inthlan hmasaa tawnhriat neih atanga insiamthat ngaite thuneitute hnena thlen  hreh lo turin a chah a. District hming chhiat leh that chu an kutah thui tak a innghah thu tarlangin, mawhphurhna an neihte tha taka an hlenchhuah theih nan training chu inchherhriam nana hman tum tlat turin a fuih nghal bawk.

Vawiin training hi Pu Benjamin Zalawma Ralte, Election Officer chuan a kaihruai a. Pu Lalrinawma, PD, DRDO Champhai, Nodal Officer (Expenditure Monitoring Cell) in Election Expenditure Monitoring hnuaia team hrang hrangte kalphung leh hmalak dante a sawifiah a. Pu Lalmalsawma Hnamte, Addl. SP, Champhaiin inthlan kaihhnawih senso hrang hrangte vil kawnga Police-te mawhphurhna a sawifiah bawk.

He hunah hian Pu K. Zorammuana, Dy. DEO/Addl. DC Champhai leh Election Expenditure Monitoring hnuaia Flying Squad (FS), Static Surveillance Team (SST), Video Surveillance Team (VST) leh Excise & Narcotics Team-te an tel a ni.

General Election to Lok Sabha, 2024 atan hian Election Expenditure Monitoring kalpui turin Champhai District-ah Flying Squad 7, 23-Champhai North A/C ah 2, 24-Champhai South A/C ah 3 leh 25-East Tuipui A/C ah 2 a awm dawn a. Static Surveillance Team 6, A/C tin tan 2 zel bakah Video Surveillance Team 3, A/C tin tan 1 zel a awm dawn a ni.