Vawiin khan DRDA Champhai buatsaihin April Ni 14 atanga May Ni 5 chhunga  hman mek Gram Swaraj Abhyaan hnuaia programme peng pakhat   ‘Gram Swaraj  Diwas’ chu hman a ni a. He hun hi Pu Lalrinliana Sailo, Tuichang Constituency bialtu MLA chuan khuallian niin a hmanpui a ni.

Pu Lalrinlian Sailo chuan sawrkar laipui scheme kalpuite a hlawhtlinna tak tak hmu tur chuan mumal leh uluk zawka thingtlang kilkhawr ber thlengpha zirtirna huapzo neih a ngai a; chumi tur chuan Gram Swaraj  Abhyaan  kalpui mek a  ni, a ti a. Sawrkar scheme leh tanpuina lokalte hman dan a dik loh chuan a tuartu chu keimahni tho kan ni dawn a ni, a ti a.  VC te pawh an kut a tla mawhphurhnate taima leh rinawm taka hlen ngam thin turin a chah a. Ram siamtha tur chuan dsawrkar mai a tawk lova, khawtlang miuite an tel ve a ngaih thu a sawi a. Tumah insawisela inpuhmawh mai lo tur leh ram siamthatna tura pen chhuak a, theihtawp chhuah tum tlat turin kalkhawmte chu a chah a ni.

Inkhawm kaihruaitu Champhai Bawrhsap Pu Vanlalnghaihsaka pawhin thu sawiin Gram Swaraj Abhyaan chu felfai leh langtlang zawka khawtlang inrelbawlna leh scheme-te kalpui anih theihna tura campaignna  a ni, a ti a. Tun hma zawng aiin Central sawrkar pawhin Scheme-te a vil uluk thu leh a tihhlawhtling kawngah tan lak angaih thu a sawi a.   Campaign hun chhunga programme  neih anih tawh dan leh programme hmabakte tarlanna a nei a ni.

He hunah hian thingtlang tihhmasawnna tur atana Scheme hrang hrangte   presentation hmanga entir a ni a. Pu F.Malsawmtluanga, Account Officer, DRDA Champhaiin MGNREGA sawifiahna, hmalakna leh hlawhtlinna hrang hrang tarlanna a nei a. Tun dinhmunah Champhai District-ah Job Card nei mi 28,414 awm mekin 2017-18 chhung khan inhlawhna ni 66 siam a ni a. Champhai District ah MGNREGA hi 2007-08 chhung khan tan niin hemi kum hian ni 46 inhlawhna siam a ni. DRDA Champhai chuan CSIR-IHBT, Palampur, Himachal Pradesh nena tangkawpin kum 2015-16 Financial year atang khan Trial Apple Cultivation Champhai District-ah  beneficiary mi 48 thlangin a kalpui tana, kumin hian tharchhuah hman beisei a ni.  Adhaar leh Job Card thlunzawm za zela 73 vel zawh tawh niin Mizoramah District titha ber a ni. Heng bakah hian Ek In thar 246, Leitha siamna khur 49, Tui dah khawlna dil 60, Anganwadi Centre 12 leh Kawng sir thingphun Kilometre 112.5 a thui te thawh zawh tawh a ni. 

Pi Esther Malsawmkim Colney, Asst Project Office (M) DRDA Champhaiin  PMAY(G) awmzia leh hmalakna te a sawifiah bawk a. Champhai District-ah kum 2017-18 khan Mirethei In sak tanpuina PMAY (G) hi tan niin beneficiary pakhatah  Rs 1,30,000  zel pek a ni a. Khawzawl, Khawbung leh Ngopa Block-ah te kalpui mek niin Khawzawlah In 38, Khawbungah In 19 leh Ngopaah In 3 te sak zawh tawh a ni. Champhai Block-ah pawh kalpui thuai tuma hmalak a ni.

Pu C.Lallawmsanga, SE Champhai Power Circle hnen atangin PMSY, Saubhagya sawifiahna leh hmalakna ngaihthlak a ni a. He scheme hi Champhaiah November Ni 11, 2017 khan hawn a ni a. May thla chhung hian Champhai District chhunga In zawng zawngte Electrict eng pek vek hman tum a ni a.  Khawzawl Division-ah In 251 leh Champhai Division-ah In 522, avaiin Electrict eng la dawnglo In 773 te chu eng pek hman tum a ni. Heng bakah  hian RGGVY leh DDUGJY te pawh kalpui a ni a, RGGVY chu zawh thawkhat a ni a. DDUGJY hnuaiah Hnahlan leh Saikhumphaiah te hna thawh niin tun atanga reilote chhunga zawh hman beisei a ni.

Pi Julie C.Mawii, District Co-ordinator, SBM (G) hnen atangin Swacch Bharat Mission (Gramin) hmalakna leh hnathawte ngaihthlak a ni  a. Champhai District chu December Ni 19, 2017 khan ODF a puan a ni a. Swachh Bharat Mission (Rural) hmalaknain thingtlang khaw 10-ah Solid Waste Management (SWM) hmun siam ni tawhin, Community Sanitary Complex (CSC) pawh 3 siam zawh a ni tawh bawk a ni.

Heng bakah hian MGNREGA, PMAY, PMSY leh SBM (G) chungchangah tawnhriat nei VC member leh beneficiary atangtein thusawi tawi ngaihthlak a ni bawk a. Pi Josephine Zorammuani Sailo, Asst. Project Officer (W/D) DRDA Champhai chuan lawmthu sawiin hun hi a khar a ni. He hunah hian sawrkar department hotute leh VC member-te an tel a ni.