Vawiin khan AH & Vety Department Champhai leh Mizoram State Veterinary Council (MSVC) huaihawtin World Veterinary Day 2018 chu khawvel hmun dangte  rualin State Vety. Hospital, Champhaiah hman a ni.

World Veterinary Day puala programme buatsaihah Dr M. Zohmingthangi, District Veterinary Officer (DVO) Champhai chuan   Ran leh a vulhtute hriselna chu inzawm tlat anih thu a sawi a. Ran vulhte chu duat taka an Ran vulhte enkawla, an hriselnate ngaipawimawh thin   tur leh hri danna pek kawngah pawh tun aia ngaihsak leh zual turin   a chah a. A thlawna World Veterinary Day puala Ran entirna leh hri danna pekna hun buatsaih chu, ran vulhtu ten chhawr tangkaia an hlawkpui ngei beiseiin a duh apiangte pan theih turin a hawng a ni.   

Vawiin World Veterinary Day programme hi Dr.B. Lallawmsanga, Veterinay Officer (VO) in a kaihruai a.  Dr. Lalrinhlui, Veterinay Officer (VO) chuan kumin atana thupui thlan ‘Role of Veterinay Profession in Sustainable Development to improve livelihood, food security and safety’ tih sawifiahna hun a nei bawk a.  Vawiin hian Ran 263 te chu  enkawlna pek niin Ui a danna hri (ARV) 17 pek a ni bawk a ni.

World Veterinary Association (WVA) chuan kum 2000 atang khan World Veterinary Day hi April thla Inrinni hnunhnung berah a hmang tan a. Kumin thupui hian Ran atanga chaw tha kan hmuhte thianghlim leh hrisel zawk anih theihna tura Ran enkawlna lama thawktute mawhphurhna leh hmalakna turte a kawk ber a. Chumi tur chuan Ran hrisel kan vulh angai hmasa a, Ran hrisel nei tur chuan a hun taka hri danna pek leh enkawlna tha pek a ngai a ni. Ran hrisel a awm chuan chaw hrisel hnianghnar kan nei ang a,  sum hailuh  lo pungin natna enkawlna atana  sum senso a tlem phah dawn bawk a ni.