607/2022-2023
Champhai, 24th May, 2022: Vawiin chawhma dar 11:00 khan District Level Committee on Green Mizoram, Champhai District chu an Chairman Pu James Lalrinchhana, District Bawrhsap hovin DC Conference Hall-ah an thukhawm a, kumin June ni 10 a Green Mizoram Day (GMD) 2022 hman dan tur chungchang an rel. Kumin Green Mizoram Day thupui thlan chu, 'Thing phun la, tuihna siam rawh' tih a ni.

Bawrhsap Pu James Lalrinchhana chuan thing leh mau, nungcha leh thil nung chi tinrengte chu inmamawh tawn vek kan nih thu sawiin, tui hna siamtu leh sik leh sa thlak danglam theitu thingte chu kan phun belh sauh sauh a tul hle a ni, a ti a. Nakin zela kan tu leh fa lo la awm turte tana ram nuam leh chenna tlak kan hnutchhiah a pawimawh thu sawiin, thing phun uar tura thangtharte kan zirtir tam a ngai a, inchhungkhur, zirnain, kohhran leh khawtlangah thing phun uar leh kan chhehvel vawnhim pawimawhzia inzirtirna kan pek tam deuh deuh a tul a ni, a ti bawk.

Pu James Lalrinchhana chuan member kalkhawmte chu hlawhtling taka Green Mizoram Day hman a nih theih nan mahni mawhphurhnate tha taka hlen theih turin a chah a. Thawhpuite leh thenrualte hnenah thingphun uar a tul thu tlangau pui zel turin a chah a, kan zavaia kan tanho tlat chuan District nuam leh hmasawn kan siam thei dawn a ni, a ti bawk.

Member Secretary Pu Lalduhthlana, DFO, Champhai Forest Division chuan nikuma Green Mizoram Day lawmna denchhenin Champhai Forest Division hnuaia Range 8 ah te thingtiak 3,066 phun a nih thu leh, he ni denchhenin thingtiak 15,339 an sem chhuah thu a sawi a. Thing tiak lian leh hrisel, nung tha ngei tur phun a nih theih nana Forest Minister thurawn bawhzuiin kum 2019-2020 atanga hmalak a nih thu leh, phun theih tawha lian niin kumin atangin phun tum a nih thu a sawi a. Forest Nursery-te chu ramhmul thing, a rah ei theih te tana gene bank anga hman a nih tel thu sawiin, ramhmul thing rah ei theih remchan angte kui tiah zel niin, tipung tur leh phun belh tura hmalak mek zel a ni, a ti a. Mipuite chu ngaihlu thiama ram thei vang tawh leh vawnhim ngaite vawnhim a nih theih nana thawhhopuiah a sawm nghal bawk.

Thukhawm chuan kumin Green Mizoram Day hawnna hun chu June ni 10, chawhma dar 11:00 ah Keilungliah khuah kamah District Bawrhsap hova hman nise a ti a. Program neih dan turte ngaihtuahho niin, program kimchang chu DFO kutah dah a ni a. Green Mizoram Day (GMD) hawnna inkhawmah hian Champhai District chhunga khua, kangmei ven kawnga hma la tha 3 te leh Champhai District-a nitin chanchinbu chhuak, kangmei ven chungchanga mipui zirtirna pe tha 3 te lawmman pek ni se tih a ni bawk a. Thingphun hnatlang neih chhunzawm nghal tur niin, Keilungliah kam leh Tuipui hnarahte thingphun hnatlang pui neih tur a ni ang.

Meeting chuan thingphuntu planting agency thawk tha, enkawl zui tha leh thingphun nung tha ber hnenah nakum Green Mizoram Day-ah lawmman pek tha a tih bakah, Green Mizoram Day hman dan leh thingphun enkawlzui zel dante thlirletna neih nise a ti bawk a. Govt. GM Higher Secondary School NSS te hnen atanga thingphunna hmun tur Plantation Site dilna lut chu a tul anga remruatna siampui turin DFO ruat a ni a. Nikuma thingphunte enkawl zui an nih dan leh rawtna awmte Pu F.Lalnunhlima, RO, Champhai Forest Range hnen atangin ngaihthlak a ni bawk.

Green Mizoram Programme hi Mizoram sawrkar hmalaknain kum 1999 atanga tan a ni a, hemi hnu hian urhsun takin District hrang hrangah Sawrkar leh NGO tangkawpin a huaihawt chhunzawm thin a, kum 2017 atang khan June ni 11 hi Green Mizoram Day atana ruat a ni a, kumin bikah chuan June ni 11 hi Holiday a nih avangin a hma ni June ni 10 ah Green Mizoram Day hman a ni ang.