608/2022-2023
Khawzawl, the 24th May, 2022: Khawzawl District Level SEDP Committee chu DC Conference Hall-ah Pu C.C. Lalchhuangkima, Deputy Commissioner kaihhruaiin vawiin khan an thukhawm.

Pu C.C. Lalchhuangkima, Deputy Commissioner chuan SEDP dawng tur thlan chungchangah remchan zawkna avangin Khawzawl District Level SEDP Committee chuan Tuichang Assembly Constituency huamchhung atang chauhin hamthatna dawng turte an thlan tur thu leh, mi 1500 an awm theih tur thu a sawi a. SEDP chu kuthnathawktute chawikanna tur Sawrkar Flagship programme pawimawh tak a nih thu sawiin, SEDP Committee member-a ruat Khawzawl District chhunga department leh khawtlang hruaitute chu hlawhtling taka kalpui a nih theih nana theihtawp chhuahpuiah a sawm a ni.

Pu Lalvenhima, Project Director, DRDA, Khawzawl chuan kalkhawmte chu an hriattur pawimawhte a hrilhfiah a, ‘SEDP-Family Oriented Programme’ kalpui tur a inkaihhruaina hrang hrang a sawizau bawk. Hei bakah hian beneficiary ni tura dilna ‘Form 1’ hman dan tur kalkhawmte hnenah a sawifiah a ni. Meeting-ah hian Khawzawl District chhunga Tuichang A/C hnuaia khaw hrang hrangte atanga Village Level SEDP Committee-te tan June 2022 ral hma ngeiin training buatsaih an rel a, training-ah hian member-te hriattur pawimawhte in hrilhhriatna neih a ni ang.