599/2024-2025

Champhai, the 30th May, 2024: Vawiin chawhma dar 11:00 khan District Level Committee on Green Mizoram, Champhai District chu an Chairman Pu James Lalrinchhana, District Bawrhsap hovin kumin June ni 11 a Green Mizoram Day, 2024 hman dan tur relin DC Conference Hall-ah an thukhawm. Kumin Green Mizoram Day (GMD) puala thupui thlan chu, 'I nunna atan thing phun rawh/Plant trees for your life' tih a ni.

He hun kaihruaitu Bawrhsap Pu James Lalrinchhana chuan District Level Committee kaihruaiin kum tin Green Mizoram Day pualin Champhaiah hlawhtling taka hun hman a nih  thin thu sawiin, thingphun mai duh tawk lova, a enkawl zui kawngah tanlak deuh deuh a tul thu a sawi a. District mipuite Green Mizoram Day puala thingphun theuh tura sawmin, Green Mizoram Day hman tur chuan thangtharte thinlungah thingphun pawimawhna tuh ngei se a duh thu a sawi bawk.

Member Secretary Pu Lalbiakchama Chawngthu,  DFO, Champhai Forest Division tarlan danin nikum Green Mizoram Day 2023 denchhen khan hmun thlan bik 2, Nagar Van, Champhai Zote leh LAD ram, New Champhaiah thing tiak 1971 phun niin, mi 590 an hnatlang a. Nikum thingphun zinga za zela 90 (90%) vel hi a nung tha tih he hunah hian tarlan a ni a. Heng bakah hian Champhai Forest Division hnuaia range hrang hrang 7 kaltlangin thingtiak phun tur Office, mimal leh pawl hnena pekchhuah 11137 a awm bawk.

Thukhawm chuan kumin Green Mizoram Day hawnna hun chu June ni 11, Thawhlehni chawhma dar 11:00 ah Mangkhaia Hall, Champhai Zotlangah hman nise tiin a rel a. Programme neih dan turte ngaihtuahho niin, program kimchang chu DFO kutah dah a ni a. Hemi puala thingphun hnatlangpui neihna hmun atan NH 6 Khankawn atanga Tuipui lei inkar bakah World Bank Road, Khankawn to Zotlangte thlan a ni a, heng hmunahte hian thingtiak 1600-1700 dawn phun theih beisei a ni a; indaih dan azirin Zotlang atanga Zokhawthar inkara thingphun thawl laite hnawhkhah nise tih a ni bawk a. Planting Agency hrang hrangte'n an thingphun theuh an enkawl zui theih nan Plot Ambassador siam zel nise tih a ni a, plot enkawl chhunzawm theih lohte Environment, Forests and Climate Change (EF&CC) in enkawl chhunzawm mai se tih a ni a. Green Mizoram Day-ah hian kangmei ven kawnga hma la tha khuate hnenah lawmman sem chhuah a ni bawk ang.