600/2024-2025

Hnahthial the 30th May, 2024: Kan hma lawk June ni 4 hian MP Inthlanpui 2024 a vote tla te chhiar an ni tawh dawn a, chumi atana inbuatsaihna chu ngawrh taka kalpui mek niin vawiin khan vote tla te chhiar tura mawhphurhna pek Counting Personnel-te tan DC Conference Hall, Rallangtlang, Hnahthial-ah training buatsaih a ni.

Khuh hawnna thu sawiin Hnahthial District Election Officer, 29-South Tuipui Assembly Segment Assistant Returning Officer (ARO) ni bawk Pu Chuauhnuna chuan Inthlanpui hmawr bawkna pawimawh tak chu uluk tak leh felfai taka vote chhiar hi a ni a ti a, vote chhiar tura ruat te chu an mawhphurhna theuh tha taka hlen tura chahin, fimkhur tak leh felfai taka vote chhiar a nih theih nan theihtawp chhuah theuh turin a chah a, vawiin training chu ngai pawimawh hle turin leh hriatthiamloh an neihte zawt hreh lo turin a chah bawk.

Vawiin training-ah hian District Election Officer Pu Chuauhnuna bakah Addl DC Pu Zothanmawia Khiangte, Project Director, DRDO Pu Malsawmtluanga Fanchun, Election Officer Pu Lalbiakfela bakah SDC Pi Betty Lalrinfeli leh Pu Vanlalruata te an tel bawk.

District Level Master Trainer (DLMT) Pi Betty Lalrinfeli chuan vawiin training hi a pe a, Counting Personnel hrang hrangte mawhphurhna leh an hriattur pawimawhte hrilhhriatna a nei. Pi Betty Lalrinfeli chuan South Tuipui AS huam chhungah Polling Station 27 a awm thu a tarlang a, Counting Table 14 ruahman a ni tiin Round 2 a chhiar zawh tum a nih thu a sawi. Table tinah Micro Observer, Counting Supervisor, Counting Assistant leh an mahni puihbawmtu tur group D staff an awm dawn bawk thu tarlangin ECI ruahmanna angin VVPAT 5 random a thlanchhuah a, VVPAT slip chhiar leh tur a nih thu a sawi bawk a ni. Training zawh hian duty tura ruat te chuan training atana hman bik Control Unit 7 hmangin a taka entirna an nei nghal a ni.