601/2024-2025

Aizawl the 30th May, 2024: Vawiin chawhma dar 10 khan Cyclone Remal avanga chhiatna thleng chungchangah Chief Secretary Conference Room, MINECO, Khatla-ah Coordination Meeting neih a ni a, Chief Secretary Dr. Renu Sharma chu chairman a ni.

He hunah hian Cyclone Remal avanga chhiatna thleng hrang hrang chungchangah Disaster Management and Rehabilitation (DM&R) Department atangin report kimchang tak pek a ni a, Department Secretary ten an department hmalakna leh harsatna te an sawi bawk. An report tlangpui chu hetiang hi a ni:

1. Public Works Department (PWD) - Leimin avanga hmun hrang hranga kawng ping then fai beih mek a ni.

2. Public Health Engineering (PHE) - Tui pek chhuahna khawl chhia a awm nual avangin tui pek chhuah theih a tlem rih dawn a, tui ren tura mipuite ngenna thu chhuah a ni a, rang taka khawl siam that tum mek a ni.

3. Power and Electricity (P&E) - Kawlphetha pek chhuahna khawl sub-station tam zawk chu siam that tawh a ni a, kar khat chhung chuan sub-station zawng zawng siam zawh hman rin a ni.

4. Food, Civil Supplies and Consumer Affairs (FCS&CA) - Champhai, Aizawl leh Serchhip district-ah buh leh vaimim tlem a chhia a, harsatna tawkte tanpui mek an ni.

5. Zangnadawmna leh chhawmdawlna pek chungchangah Chairman Dr. Renu Sharma chuan rang taka pek a nih theih nan mamawh ang ang report vat turin hruaitute a chah a ni.

6. Central sawrkar hnenah report thehluh a ni dawn a, heng department panga PWD, DM&R, PHE, P&E leh FCS&CA Secretary te naktuk chawhmaah report thehluh tur te chu peih fel hman turin Chairman Dr. Renu Sharma chuan a chah a ni.

Chairman Dr. Renu Sharma chuan department hrang hrang hruaitute fakin an thawk tha a, an thawk rang a tih thu a sawi a, dinhmun hre chianga mahni chanpual chin vil tha turin a fuih a ni. Chhiatna thlen leh hun atana kal dan tur mumal tak (Standard Operating Procedure) nei theuh turin hruaitute a chah a, chhiatna laka mipui him zawk theih nan in sak danah te, kawr siam danah te leh kawng siam danah te dan leh kalphung tha zawk ngaihtuah chhuak turin a fuih bawk a ni.

He hunah hian Health and Family Welfare Principal Secretary te, Home Department, GAD leh PWD Commissioner & Secretary te, DM&R, PHE, P&E leh FCS&CA Secretary te, DM&R leh Geology and Mining Director te, Aizawl Bawrhsap te leh State Meteorological Centre atangin Chief Scientific Officer te an lo tel a ni.