602/2024-2025

Champhai, the 30th May, 2024: Lok Sabha Inthlanpui, 2024 a Champhai District huamchhunga Asembly Segment 3 a vote tlate chhiar tura inpuahchahna leh tul dangte vawiin chawhnu dar 1:00 khan District Election Officer Pu James Lalrinchhana, Assistant Returning Officer (ARO) kaihruaiin DC Conference Hall-ah sawiho a ni.

Pu James Lalrinchhana chuan June ni 4, 2024 zing dar 8 atanga vote chhiar tan tur a nih thu sawiin, inpuahchahna pawh kalpui chhoh mek zel niin boruak muanawm tak hnuaiah felfai taka vote chhiar a nih theih nan theihtawp chhuah tlan a tul a ni, a ti a. Vote chhiar tikhaihlak thei leh harsatna awm theite lakah invenlawk a tul thu tarlangin, harsatna thleng thulh thei laka chetlak dan tur pawh lo ruahman lawk a tul thu a sawi bawk.

Pu Vineet Kumar, SP Champhaiin vote chhiar ni Counting Day atana venhimna leh traffic chungchanga ruahmanna siamte a sawifiah a. Pu Lalrinawma, Addl. ARO, 25-East Tuipui Assembly Segment leh Pu K. Zorammuana, Addl. ARO, 23-Champhai North Assembly Segment-te hnen atangin hriattur pawimawh leh tul hrang hrangte ngaihthlak a ni a. Pu Benjamin Zalawma Ralte, Election Officer-in vote chhiar dan tur ruahmanna Counting Plan leh hemi ni atana ruahmanna Counting Day Plan a sawifiah a. DIPRO, P&E, PHE leh inbiakpawhna lama pawimawh tak service provider pahnih BSNL leh Airtel hotute hnen atangin inpuahchahna leh ruahmanna an  siamte ngaihthlak a ni.

He huna tarlan a nih dan chuan June ni 4, 2024 zing dar 8:00 atang hian Lok Sabha Inthlanpui, 2024 a vote tlate chhiar a ni dawn a. Champhai District chhunga Assembly Segment (AS) 3, 23-Champhai North, 24-Champhai South leh 25-East Tuipui a vote tlate chu Counting Hall  hran theuhah chhiar tur niin, Counting Hall tinah hian Counting Table 8 bakah VVPAT Counting Booth (VCB) 1 zel ruahman a ni a; avaiin Counting Table 24 leh VVPAT Counting Booth 3 ruahman niin vote tlate hi round 4 a chhiar zawh tum a ni.

Vawiin meeting-ah hian Champhai District chhunga State Level Master Trainer, District Level Master Trainer leh Assembly Level Master Trainer-te an tel bawk.