962/2026-2027

Green Mizoram Day 2026 chu vawiin khan District Bawrhsap Pu Mohammad Aaquib hovin Champhai ah pawh hman a ni.

Green Mizoram Day hmanpuitu Bawrhsap Pu Mohammad Aaquib chuan thusawiin Mizoram ah kum thum bawr vel chauh la awm mahse a boruak nuam a tih thu a sawi a, India ram hmun dang chu khawlum a nasat em avangin an khuaa a haw chang pawhin Mizoram a ngaih thin thu a sawi a, Mizoram ah pawh Champhai chu boruak thiang nuam a tih ber thu a tarlang.

Mizoram ah chuan hmasawnna hnathawh  a nih dawn apianga environment ngaihpawimawh a ni thin te chu lawmawm a tih thu a sawi a, Development leh Environment a kalkawp tlat loh chuan boruak thianghlim a awm theih loh thu a sawi a, chutiang ni tur chuan mitin ten thing phun mai bakah a humhalh kawngah thanharh a tul thu a sawi a, chutihrualin hah taka thing an phun tawh sa te, tleirawl hawklak leh kut hlei ten an lo thai rang thin chu pawi a tih thu a sawi a.

Green Mizoram Day ah chauh thing leh mau humhalh lovin nitin humhalh a tul tih a sawi a, mahni theih tawkah thing phun uar zel a ngai tih a sawi bawk. DFO staff te bakah Department hrang hrang staff te, NGO hrang hrang kalkhawmte chu chibai a buk a, hun nuam tak hmang turin duhsakna a hlan a, DFO chhuak mai turin Champhai tana a hnathawh hlawk thlak tak tak te chu fakawm a tih thu leh a kalzelna turah pawh hna tha a thawh zel theihna turin duhsakna a hlan bawk.

He hun hi Sikpui Run, Champhai Zote ah hman a ni a, thupui atan "Thing hi rangkachak anga hlu, nunna tinreng bul a ni." tih hman a ni a, DFO Pu Lalbiakchama Chawngthu, member secretary chuan Green Mizoram Day, 2026 Champhai District hawnna inkhawm hi a kaihruai a, Green Mizoram Day lo chhuah dan a tarlang bawk.

Green Mizoram Day, 2026 pual hian Zote tiau kawng dung sir tluanin thing phun a ni a, sawrkar Department hrang hrang bakah NGO te chu thingphunna tur hmun siamsak theuh an ni a, anmahni chanpual theuhah thing an phun a ni.

Kum 1999 khan Green Aizawl chu Green Mizoram tia thlak niin heta tang hian kum tin Green Mizoram Day hi hman a ni ta a, District Level Committee te hmalakna in thingphun thin a ni.