4173/2023-2024

Champhai, the 14th March, 2024: Vawiin chawhma dar 11:00 khan Taxation Department bultumin Champhai Vengthlang Hall-ah GST chungchang zirhona leh sawihona GST Awareness Campaign buatsaih a ni.

Khuallian ni a he hun hmanpuitu Pu Lalthansanga, Addl. Commissioner of State Tax, Taxation Department chuan thu sawiin, "Tun hmain chhiah chu inawpbehna leh inhremna hmanrua a ni thin a, tunah chuan khua leh tui thain ram hmasawnna tura a tih tur a ni", a ti a. Chhiah tel lovin ram a kal theih loh thu sawiin, sawrkar laipui atanga state-in pawisa a hmuhte a tla hniam telh telh a, State chu mipui chhiah chawi tlingkhawm atanga a inenkawl chhoh zel a ngaih dawn avangin mipuiin chhiah pek an ngaih pawimawh deuh deuh a tul thu a sawi bawk.

Pu Lalthansanga chuan GST chu sawrkar laipui pawhin a ngai pawimawh hle tih sawiin, India ram puma chiah chawi dan inang lo hman thin chu a buaithlak avangin dan thar, GST chu hman a ni tih a sawi a. Champhai chu ramria insumdawntawnna hmun tur a ni a, ram pahnihin insumdawnna fel tak a neih hunah sumdawngte an pawimawh dawn a ni tiin, Myanmar nena insumdawntawnna dan ang taka a kal theih hunah chuan chhiah pawh tun aia hmuh tam a rin thu a sawi a. Tha taka sawrkar tawiawm turin sumdawngte a sawm nghal bawk.

Addl. Commissioner of State Tax chuan nikumah Taxation Department-in target an neih chu cheng vaibelchhe 900 ni mah se, cheng vaibelchhe 1020 an hmu tih a sawi a. Kuminah cheng vaibelchhe 1080 target a nih thu leh tun dinhmunah cheng vaibelchhe 1026 hmuh tawh a nih thu sawiin, khum ngei an beisei thu a sawi bawk.

Vawiina GST Awareness Campaign-ah hian Champhaia dawrkaite leh sumdawngte kohkhawm niin, Pi Mona Zote, Dy. Commissioner of State Tax, Taxation Department, Champhai Zone chuan he hun hi kaihruaiin resource person Pu C. Lathazuala, Asst. Commissioner of State Tax-in GST-a hriat tur pawimawh hrang hrangte a zirtir a. Pu C. Zonunpuia, Head Assistant, Taxation Department, Champhai Zone chuan lawmthu sawiin hun hman hi a khar a ni.

He hunah hian GST pek dik loh vanga hremna awm thei pumpelh tura GST pek dan dikte sumdawngte zirtir an ni a. Hun kal tawha chhiah an lo pek dik tawh loh haichhuahna tur scrutiny leh audit kalpui chhoh mek a nih thute tarlan a ni a. Sumdawngte chu anmahni kutkawiha GST pek dan an thiam lo a nih pawhin pe tura mi dang an rawihna kawngah fimkhur taka kalpui tura hrilhhriat an ni bawk.