867/2023-2024

Champhai, the 21st June, 2023: Vawiin khan sawi lawk awm lovin Champhai khawpui chhung sumdawnna hmun lunlaiahte hman khat daih plastic/polythene, Single Use Plastic (SUP) zawrh leh hman a awm em tih District Bawrhsap Pu James Lalrinchhana hova endik a ni a, hman khat daih polythene/plastic zawrh leh hman engemawzah man a ni.

Champhai District Bawrhsap Pu James Lalrinchhana chuan hman khat daih polythene/plastic Single Use Plastic hmang lo tura hmalak chhoh mek zel a nih thu leh Champhaiah pawh inzirtirna kum 1 dawn kalpui a nih tawh thu a sawi a. Environment tana nghawng thalo tak nei a nih avangin avaia tihrem vek har rih mah se, a tlem thei ang ber hman a nih theih nan tanrual a pawimawh thu a sawi bawk.

Single Use Plastic endikna hi thla khata vawi 4 neih tuma ruahmanna siam a ni a, endiktu team-te hian sawi lawk awm lova endikna surprise check an nei thin dawn a ni. Vawiin bikah chuan Champhai Vengthlang huam chhung Awmpuiphei leh Dawr Vengte bakah Venglai Bazar-ahte endikna neih a ni a. Hman khat daih polythene leh plastic engemawzah man a ni a, inhrilhhriatna hun neih pah zel a ni bawk. Hemi kawnga hmalatu District Level Team chuan mipuite hman khat chauh daih polythene/plastic hman, lei leh hralhte ti lo turin a chah a, a theihna apianga pumpelh hram hram tum turin a chah nghal bawk.

Vawiin endikna hunah hian Team Leader District Bawrhsap Pu James Lalrinchhana bakah Pu Lalrinawma Khiangte, DUDO Champhai, Pu Vanlalpara DMO leh Official dangte an tel a ni.