3108/2024-2025

Champhai, 20th November 2024: Mizoram State Commission for Women leh Champhai District Programme Officer’s Office, Women & Child Development te tangkawp buatsaihin vawiin khan hmeichhiate humhalhna dan leh hmeichhiate  hriselna kaihhnawih zirhona (Awareness  Campaign)  buatsaih a ni a. Mizoram State Commission for Women Chairperson Pi C.Zodinpuii chuan a hmanpui.

Govt. Champhai College Multipurpose Hall-a Legal Awareness Programme on Laws Related to Women and Health and Nutrition buatsaihah hian khuallian Pi C.Zodinpuii, Chairperson, Mizoram State Commission for Women chuan thu sawiin, hmeichhiate tan danin min humhalhna te leh eng nge an nih tih te, a tuartu emaw harsatna tawk ni ta ila, engtia kalpui tur nge tih te mitinin kan hriatchian a ngaiin inhrilh nawn fo a tul a. Dante hi chipchiar zawka kan zir theih nan legal awareness hi buatsaih a ni, a ti a. Hetiang hun hi Mizoram hmun dangah pawh buatsaih tum a nih thu a sawi a. Kalkhawmte chu an dikna leh chanvote humhalh a nih theihna turin a kaihhnawih dante hriatchiang a, ngai pawimawh turin a chah a ni. 

Pi C.Zodinpuii chuan he hunah hian Mizoram State Commission for Women hmalakna tarlangin hmeichhe jail leh hmeichhe lam buaipui bik police te bakah damdawi in te an tlawh kual tawh tih a sawi a. Hengah hian an tlakbalna leh hmasawn ngaihnate enfiahin, thawm ṭhat dan tur sawrkar hnena thlen a nih tawh thu a sawi bawk.

Vawiin awareness campaign-ah hian inkhawm kaihhruaitu Pu Lalrinmuana, DPO, Champhai District chuan Digital Literacy leh Cyber Security chungchangah zirtirna a pe a. Pu C.Vanlalruata, Chief Legal Aid Defence Counsel chuan dan thar hnuaia hmeichhiate humhalhna chungchangah te, Mizoram Marriage, Divorce and Inheritance of Property Act, 2014 chungchangah te zirtirna a pe a. Pi C.Zodinpuii hian danin hmeichhiate a humhalhna dan chungchang sawi bawkin,  sawihona hun hman nghal a ni a. Pi Vanlalrochhari, Member, Mizoram State Commission for Women chuan lawmthu sawiin a khar a ni.

Legal Awareness campaign hi naktukah hian Khawzawlah  neih leh tur a ni.