3109/2024-2025

Dated Kolasib the 20th November 2024: National Health Mission hnuaia National Health Programme hrang hrang awmte zirchianga endiktu ‘Common Review Mission (CRM) Monitoring Team’ chuan Health & Family Welfare Department Kolasib District an tlawh a. He hun hi Kolasib Addl. DC Pi B. Malsawmtluangi chuan Kolasib DC Circuit House-ah a hman pui a ni.

Addl. DC Pi B. Malsawmtluangi chuan, he huna kalkhawmte hmaah CRM Monitoring Team-te lawmna thu sawiin, Central Common Review Mission Monitoring Team-te'n mipui hriselna kawnga hmasawnna a awm theihna atan leh an harsatna hrang hrang sutkian anih theih nana a hmun ngei a Kolasib District an rawn tlawh thei chu lawmawm a tih thu a sawi a. Kolasiba an cham chhung hian hriselna lama thawktute leh Health & Wellness Centre-te tha tak leh tluang taka zirchianna an neih theih nan duhsakna a hlan a ni. Pi B. Malsawmtluangi chuan hriselna chu mihring nuna thil pawimawh a nih angin Sawrkar pawhin mipuite hriselna a ngaih pawimawh thu leh hriselna kawnga hmasawnna leh rahbi thar kan kai zel theih nan chak takin hma a lak thin thu a tarlang a. Mipui hriselna kawnga thawktu Medical mite thawhrimna leh inpekna chu fakawm a tih thu a sawi bawk.

Dr. RK Lalthlamuana, Senior Chief Medical Officer, Kolasib chuan, Health & Family Welfare Department hnuaia Kolasib District chhunga hriselna kawnga hmalakna hrang hrangte Report a pe a. Dr Lalawmpuia Chhangte, Joint Director (L), SNO NUHM leh SPO NIDDCP ni bawk chuan he inlawmna hun hi kaihhruai in thusawina hun a hmang a. Mipuite hriselna kawnga hmasawnna tur leh inkaihhruaina tha taka kalpui a nih theih nan Sawrkar in Monitoring Team leh Expert Team a nei chu a lawmawm a tih thu a sawi a. Vawiina National Mission hnuai ‘Common Review Mission Monitoring Team’ ten Kolasib District huamchhunga an zirchianna chuan mipui hrilselna kawnga rahtha a chhuah ngei a beisei thu a sawi.

Kolasib DC Circuit House a hun hman zawh hnu hian ‘Common Review Mission Monitoring Team’ (CRM) hian Kolasib khawchhunga Health & Wellness Centre Tumpui SC-HWC, Diakkawn SC-HWC, Urban Health & Wellness Centre Venglai East, Urban Primary Health Centre Vengthar bakah Ayush Health & Wellness Centre, Thingdawlte a hmunah an tlawh nghal a. November ni 20 atanga ni 23 chhung hian Kolasib District huamchhunga Health & Welness Centre hrang hrangte, Community Health Centre Vairengte, Bilkhawthlir PHC leh District Hospital Kolasib te an tlawh dawn a ni. Common Review Mission Monitoring Team-te hian National Health Mission hnuaia National Health Programme awmte tha taka kalpui a nih theih nan Supervision and Supportive Monitoring an nei dawn a. Kolasib leh Lunglei District chhungah Team hnih a inthen mekin Monitoring an neih zawhah State Level-ah Debriefing neih a ni leh dawn a ni.

Vawiin a Kolasib a Common Review Mission Monitoring Team Member kalte hi Dr. Renu Aggarwal, Professor & Head, Community Medecine Department, Sarojini Naidu Medical College, Agra (UP) in a ho a ni.