135/2024-2025 

Champhai, the 10th April, 2024: General Election to Lok Sabha, 2024 atan vawiin chawhma dar 11:00 khan DC Conference Hall, Champhaiah kum 85 chunglam leh rualbanlote tana in lama vote thlak theihna 'Home Voting' chungchang inzirtirna home voting training thawhhnihna leh a hnuhnung ber zawh fel a ni a, April ni 12, 2024 atangin Champhai District-ah Home Voting kalpui tan a ni ang.

He hun hmanpuitu District Election Officer Pu James Lalrinchhana chuan in lama vote thlak 'home voting' chu Indian democracy chawinun zel nana hmanraw pawimawh tak leh ECI hmalakna chhuanawm tak a nih thu a sawi a. Election inpuahchahna chak taka kalpui a nih thu leh a hmawr bawk hnai a nih tawh thu sawiin, home voting chu a nawlpui vote thlak hmaa vote thlak bultanna, inthlan tenau a ni, a ti a. Hemi hnuaia hmalakna chu ECI in a ngaihpawimawh em avangin kalpah mai mai a rem dawn loh thu leh inthlan hmasa aia felfai leh changtlung zawka kalpui tum a nih thu a sawi a. Home voting kalpui tura ruat Mobile Polling Team-te chu mi rintlak leh fel tak tak thlanchhuahte an nih thu sawiin, an chunga rinna Sawrkarin a nghah chu rinngam leh inrintawkna nena hlen tum turin a fuih a. Inthlanna muanawm leh felfai puitlin ngei tuma home voting kalpui tha district nih tum turin a chah nghal bawk.

Thusawitu dang Dy. DEO Pu K. Zorammuana chuan ECI in mitin huapzo vote thlak a ngaih pawimawh avangin Polling Station pan kawnga harsatna nei kum upa leh rualbanlote tan home voting a siam thu a sawi a. ECI hmalakna pawimawh tak tihlawhtlingtu tur an nih thu sawiin, thahnemngai taka mawhphurhna hlen chhuah tum turin a chah a ni.

He hun hi Pu Benjamin Zalawma Ralte, Election Officer chuan a kaihruai a. Pu Lalmalsawma Hnamte, Addl. SP hnen atangin home voting kalpui kawnga venhim hna thawktu Security Personnel-te hnathawh leh mawhphurhna a sawifiah a. Pu N. Lalzarzova, BDO Khawbung/ALMT hnen atangin home voting kalpuitu tur Mobile Polling Team kalphung leh mawhphurhnate ngaihthlak a ni a. Mobile Polling Team-te hi secrecy of voting zawm tha tur leh hawihhawmna ngaipawimawh tura chah an ni a. Zawhna leh chhanna hun hlawkthlak tak hman niin, a takin home voting kalpui dan entira zir a ni bawk.

In lama vote thlak theite hi kum 85 chunglam leh rualbanlo, PwD E-Roll database a chuang benchmark certificate neite an ni a. Ruahman dan chuan Champhai District-ah April ni 12 leh April ni 13, 2024 hian in lama vote thlak turte panchilha postal ballot hmanga vote thlaktir an ni dawn a, Mobile Polling Team-te hi zing dar 7:00 ah DC Office, Keifangtlang atangin an chhuak dawn a ni. Rokhawlhna avanga voter awm remchang lo an awm a nih chuan April ni 15, 2024 hian neih leh tum a ni. Vote thlak lai hriatpui tur hian Candidate-te chu booth pakhatah aiawh pakhat zel tirh phalsak an ni.

Champhai District-ah home voting dilna lut pawmsak mi 134 an awm a; heng zinga 133 hi kum 85 chunglam niin, rualbanlo 1 a awm a. Home voting kalpui tur hian Mobile Polling Team 16 ruat an ni a, heng bakah hian reserve team 4 ruat an ni bawk a. Team tinah hian member 4, Polling Official 2, Microobserver 1 leh Security Personnel 1 zel an awm a ni.