Nimin (4.9.2015) khan Horticulture Department chuan Champhai Kahrawt YMA Hall-ah NLUP Beneficiaries (chhungkaw) 125 te hnenah 2nd phase Final installment a sem bakah hamthatna dawngtute hnenah thei enkawl dan zirtina a pe nghal a ni.
He hun, Pu Vansanga, SDHO kaihhruaiah hian Khawzawl DHO Pu Lalhmangaiha chuan hmanpuiin, Horticulture Department hnuaia NLUP hamthatna dawngtu chhungkaw thenkhat hmala tha tawk lo an awm thu leh abikin NLUP 2nd phase dawngtute zingah mahni eizawnna tura thlai chin thlang si dinchhuahpui tlak a hmala tha tawklo leh inthlah dah an awm chu pawi atih thu sawiin, hun lo kal turah an inchhir lohna tura bul tan tha leh turin a chah a. Hamthatna dawngtu rinawm tak leh thawhrimna nena hmalazui tu chhungkaw tam takte chuan eizawnna nghet an neih phah ngei dawn tih a tarlang tel bawk.
NLUP sem chhuah rual hian Horticulture Deptt chuan loneitute hnenah thlai chin danah training an pe nghal bawk a ni. NLUP 2nd Phase final installment-ah hian cheng 28,99,490 sem chhuah a ni a. Sethlum chin thlangtu mi 27 hnenah cheng 834300 sem chhuah a ni a; Grape chingtu mi 75 hnenah cheng 1196625; Sapthei chin thlangtu mi 3 hnenah cheng 68565 leh lakhuihthei chin thlangtu mi 20 hnenah cheng nuai 8 sem chhuah a ni a, sum hi cheque hmanga pe chhuakin, beneficiary-te bank account-ah thunfel nghal a ni.
