Anthurium Festival 2015 Organising Committee chu an Chairman, Tourism Minister Pu John Rotluangliana hovin nimin khan Anthurium Festival neihna tur hmun Lengpui Mini Sports Complex an tlawh.
Pu John Rotluangliana chuan Anthurium Festival hi a chhimtute tana hlimawm taka buatsaih tum a nih piah lamah mipuite himna ngaih pawimawh a nih tur thu a sawi a. Hlimna niah chetsual palh a hlauhawm a, chuvangin a theih chinah chuan engkim felfai taka ruahmana, inbuatsaihna tha taka kalpui tum a ni, a ti. He Kut hi hlawhtling taka hman a nih theih nan Lengpui khawtlang hruaitute leh mipui tawiawmna a ngen bawk.
Mini Sports Complex khelmuala kawlphetha, tui leh mamawh dang lakluh dan tur te, stage siam dan tur te, mipui thutna tur leh parking area siam dan tur te Minister ho hian en fel a ni.
Nimin vek khan Tourism Minister hian Lengpuia Bamboo Centre of Excellence a tlawh nghal a. He Centre hi Environment & Forests Department enkawlna hnuaiah awmin ram pawn leh ram chhunga mau chi hrang hrang variety 28 zet hmuh tur a awm a. Khawl hmanga mau sawngbawlna hmun pawh awmin hetah hian mau atanga siam tray leh in cheimawina chi dang siamna khawlte, agarbati stick leh hnang hlaina khawl te a awm. Anthurium Festival neih rual hian Centre of Excellence-ah hian Bamboo Day hman nghal tum a ni a. Bamboo products exhibition leh sale a awm dawn bakah loneitute tan mau phun leh enkawl dan zirtirna te neih nghal tum a ni.
Minister hi Parliamentary Secretary Pu TT Zothansanga, Tourism Secretary Pu V.Lalremthanga, Organising Committee member dangte bakah Lengpui VC leh YMA hruaituten an tawiawm a ni.
