775/2022-2023 

Champhai, the 3rd June, 2022: Vawiin chawhnu dar 3:00 khan Education Training Hall, Champhaiah kumin HSLC leh HSSLC result chhuaka ti thate lawmpuina hun District Education Office buatsaihin hman a ni a, he hun hi District Bawrhsap Pu James Lalrinchhana chuan khuallian niin a hmanpui a ni.

District Bawrhsap Pu James Lalrinchhana chuan lawmte lawmpuina hun Education Department buatsaiha hman a ni chu finthlak tiin, thawhrimna rah inhriatpuitawnna district huap program buatsaih a ni chuan chona thar a siam ngei a beisei thu a sawi a. Hei aia tam lawm tur a awm zel ang tih ka beisei a ti a, pass kim vek thei Sikul leh mimal tithate chu chhuanawm tiin, thinlung taka a lawmpui thu a sawi a. Zirna tha leh hmasawn neih theih nan Zirtirtu, Zirlai leh nu leh pate thawhhona a pawimawh ber thu sawiin, zirna kailawnah primary atanga a chunglam thlengin eng level  pawhin pawimawhna a nei vek a ni, a ti.

Zirna in leh mamawhte a tul anga ngaihtuah zel tum a nih thu sawiin, Sikul hmunhma, building that leh that loh aimahin zirna dah pawimawh hmasak a ngaih thu a sawi a. Zirtirtu hmingthatna neih let leh tuma tanlak zel angaih thu a sawi bawk a. Zirlai hlawhtlinna changte chuan an nu leh pa te an chawimawi thu sawiin, nu leh pa kan chawimawi theihna chu a tha lama rualela hlawhtlinna chan a ni a, a Pathian thu hle bawk a ni, a ti. Hlawhtlinna chang zawng zawngte a lawmpui thu sawiin, thiamna an neihte ram leh hnam tana hmanga pe lettu nih tum turin a fuih a. Tha thlah lova hlawhtlinna sang zawk chang thei tura tan la sauh sauh turte, inthlahdah lova kal zel turte leh midang tana malsawmna nih tum turin a fuih bawk.

Hlawhtlinna chang ve ta lo te pawh beidawng mai lova an chak lohnate inenleta insiamthat nana hmang tur leh, hun tha neih leh hmasak berah hlawhtlinna chan tum turin a chah bawk a. Zirnaah hmabak eng tak Champhai District-in a neih thu sawiin, hlawhtling turin kan zavaia tanho a ngai a, theihtawp i chhuah tlang zel ang u tiin District mipuite a sawm a ni.

He hun hi Pu H.Darhmingliana, Dy. DPC, Samagra Shiksha chuan a kaihruai a. Pu T.T Laltanpuia, DEO & DPC, Samagra Shiksha hnen atangin thusawi ngaihthlak a ni bawk.

He hunah hian mimal titha lawmman hlan zingah HSSLC Commerce Subject-a pangana dinhmun hauhtu Zonunmawia S/o J.Lalnunzira, Govt. G.M. HSS (441/500 marks), HSLC  Mathematics Subject Topper  VL Hruaitluanga Fanai S/o F.Lalthawmmawia, BC Lalthlamuana English Academy (99 marks) leh Subject Teacher Pu F.Lalrinngheta, Mizo Subject Topper Lalramtharzuala S/o Lalhuapzauva, Champhai Venglai RMSA Secondary School (97 marks) leh Subject Teacher  Pi  Lalkhawngaihi & Pu C.Lalzidinga, Benjamin Lalrinawma S/o Rokhawliana, Pine Hill Adventist Academy, Champhai (97 marks) leh Subject Teacher Pi Rohlupuii Chhangte te hnenah lawmpuina Deputy Commissioner  Pu James Lalrinchhana'n a hlan a. School pass kim vek High School 11 leh Higher Secondary School 2, avaiin School 13 te hnenah lawmpuina District Education Officer leh Addl. District Project Coordinator ten an hlan bawk.

School pass kim vek lawmman hlante chu High School huangah School 11; B.C. Lalthlamuana English Academy (Private, 84 Candidates), Bethel Mission School (Private, 42 Candidates), Presbyterian English School, Zotlang (Lumpsum Aided, 40 Candidates), Springdale Academy (Private, 36 Candidates), Holy Angels School (Private, 34 Candidates), Holy Mission School (Private, 33 Candidates), Vengsang High School (Adhoc Aided, 23 Candidates), King Solomon's High School (Private, 18 Candidates), Vaikhawtlang High School (Lumpsum Aided, 9 Candidates), Govt. Bungzung High School (Government, 7 Candidates) leh Tuipui RMSA Secondary School (Government, 5 Candidates) te an ni a. Higher Secondary School huangah pass kim vek School 2; Hnahlan Higher Secondary School (Private, Arts, 30 Candidates) leh Zokhawthar Higher Secondary School (Private, Arts, 19 Candidates) te an awm a ni.