774/2022-2023
Champhai, 3rd June, 2022: Damdawiin fai inelna Kayakalp hnuaia District Hospital fai inelna huanga District Hospital Champhai in lawmman a lak pahnih; kum 2020 a Commendation Award leh kum 2021 a lawmman pathumna a lak lawmna hun Hospital OPD Complex-a neih chu vawiin chawhnu dar 2:00 khan H&FW Board Vice Chairman Dr. Z.R Thiamsanga, Champhai North bialtu MLA chuan a hmanpui.

Khuallian Dr. ZR Thiamsanga chuan hun engemawchen atanga Hospital fai inelna buatsaihah District Hospital Champhai a titha berte zinga a lang pha thin chu fakawm a tih thu sawiin, Champhai khawpui fai, mawi leh hrisel siam turin kum 2019 atangin Clean Beautiful & Healthy Champhai project kalpui tan a nih thu leh, hrileng vanga hmalakna chak zawk kalpui theih ni lo mahse, theihtawp chhuaha hmalak chhunzawm zel tum a ni, a ti.

Hriselna kawnga hmasawnna nan theihtawp chhuah a nih thu sawiin, Health Clinic 200 chuangah thawktu lak tum a nih thu leh, health department hnuaia indaihlohna phuhruk turin hna lak tum a ni, a ti a. Cancer Hospital-ah hmanraw tha zawk dah a nih bakah JICA nena thawhhona Cancer Speciality Hospital din tum a ni, a ti a. District Hospital Champhaia hmalaknate tarlangin, ICU leh Dialysis dah chu tangkai taka hman a nih thu a sawi a. Heng bakah hian Trauma Centre peih thuai tum a ni a, Ayush Hospital khum 50 awmna tur Champhaiah siam tum a ni bawk a, Critical Care Hospital, cheng vaibelchhe 22 senna tur atan engkim tihfel niin phalna hmuh a ni tawh, a ti bawk.

Rokhawlhna neuh neuh avanga Champhaia MYC Coaching Centre pawh hawn mai theih loh pawh June thla chhunga hawn hman tum a ni, a ti a. Nursing School Hostel sak tum a nih thu leh, ataka kalpui a nih theih nan hmalak chhoh mek zel a nih thu a sawi bawk a. Khawpui chhunga Sub-Centre thenkhat tih loh Sub-Centre tinte Health & Wellness Centre-ah dah vek tawh a ni, a ti a. Sawrkarin primary health care a ngaihpawimawh thu pawh sawiin, Doctor-te an hnathawh hun chhung ngaipawimawha rinawm taka thawk tur leh, damlo an buaipui leh enkawl kawngah a bik takin emergency call-ah theihtawp chhuah turin a chah a. Hriselna lama thawktute chu mipuite hnena primary health care inzirtirna tam zawk nei thin turin a chah bawk.

Khualzahawm Champhai DC Pu James Lalrinchhana chuan fai inelna huanga hlawhtlinna chang fo thin District Hospital Champhai a lawmpui thu leh chhuanawm a tih thu sawiin, faina chuan hriselna a kentel tlat avangin tha thlah lova theihtawp chhuah chhunzawm turin a fuih a. Hospital fai leh hmasawn siam kawngah department hrang hrangte tawiawmna a ngaih thu sawiin, mipuite pawhin Hospital thawktute kan thlawp tlat a ngai a ni, a ti bawk.

Hna ropui taka thawktu Hospital Staff-te chu damlo leh mamawhtu an hnena tlulutte hmangaih rawngbawlna nena tuamhlawm thin tur leh, Hospital fai mai piah lamah rilru leh thinlung fai tak nei fo zel turin a fuih a. District Hospital Champhai tihhmasawn kawnga Health & Family Welfare Board Vice Chairman hmalaknate fakawm a tih thu a sawi bawk.

He hunah hian Rev. Lianmunga'n hunserh a hmang a. Dr. Zatluanga District Medical Superintendent-in kalkhawmte lawmna hun a hman hnuah Kayakalp report Dr. KT Lalrammawia hnen atangin ngaihthlak a ni a. Dr. R. Lianmawia, CMO hnen atangin thusawi ngaihthlak a ni bawk a. Pi H. Vanlalhluni, Nursing Superintendent-in lawmthu sawiin hun a khar a ni.

Kum 2016 atang khan District Hospital Champhai hi Kayakalp inelnaah tel tanin lawmman pakhatna a dawng a. Kum 2020 ah Commendation Award a dawng tih lohah chuan top 3 ah a la lang char char a ni.