1689/2025-2026

Champhai, dated 15th August 2025: Vawiin chawhma dar 11:00 khan Chhangphut Field-ah India ram zalenna ni (Independence Day) vawi 79-na chu India ram hmun dangte rualin urhsun taka lawm a ni a. He hunah hian khuallian Environment, Forest and Climate Change (EF&CC) Minister Pu Lalthansanga chuan hnam puanzar pawt pharhin, Parade Contingent 18 te hnam puanzar chibai buk a chhanglet a. Adviser to CM, Er. Ginzalala, Champhai North bialtu leh Champhai South bialtu MLA Lt. Col. Clement Lalhmingthanga te'n he hun hi an hmanpui a ni.

Minister Pu Lalthansanga chuan he Independence Day vawi 79-na, ram zalenna niah hian Champhaia hun a hmang thei hi lawmawm a tih thu sawiin mipuite chibai a buk a, ram zalenna sualchhuaktute, thih dawn lova theihtawp lo chhuah te kha hre renga zahna chibai buk turin mipuite a sawm. Champhai district chuan hma a sawn nasa hle a, sawrkar department hrang hrangte hma an lak that zarah an changkangin an sang zel a ni tih sawiin hnathawh hrang hrang te a tarlang a. Bana Kaih scheme hnuaiah hian Champhai District atangin pilot phase hnuaiah Progress Partner 41, CM Special Package hnuaiah Progress Partner 96 an awm a, department 7 hnuaiah hmalakna hrang hrang a awm chho mek a ni tih a sawi a. District Agriculture Marketing Committee (DAMC) sawhthing an hralh that thu te, Police leh Excise & Narcotics te'n zu leh ruihhlo an man tam thu te, agriculture and allied sectors hnuaia hmalakna hrang hrang, thlai hralh that thu leh kuthnathawkte tanpuina dawn that thu te, works department hrang hrang hnuaia mipui mamawh tak project kal mek te, zirna te, hriselna te leh mipui hamthatna atana department hrang hrang hmalakna tha tak tak te a sawi lang a. Ruihhlo laka inthiarfihlim tur leh midang pawh kawng dika kaihruai zel turin mipuite a fuih a, Mizoram sawrkar chuan Champhai leh ram mipui zawng zawng te hmasawnna atan theihtawp a chhuah zel dawn tih a sawi. Hmasawnna hna thawh tawhnaa sawrkar mipui ten an thawhpui tawhna zawng zawngah lawmthu a sawi a, hmasawnna lo thleng mek leh lo awm leh zel turah pawh thawhpuia tawiawm turin a sawm bawk a ni.

Minister Pu Lalthansanga hian Parade Contingent-te hnenah lawmman a hlan a, Independence Day Ceremonial Parade, Champhaia lawmman dawngtute chu:

Unarmed Contingent
1. Govt Vengthlang Middle School, Boys Scout II
2. NCC, Govt. GM High School, Girls Contingent
3. Bharat Scout and Guide, Agape

School Contingent
1. Govt. Roseland Middle School, Girls Contingent
2. Pinehill Adventist Academy, Girls Contingent
3. CC Lalthamuana English Academy
te an ni.

Rajya Puraskar (state level scout and guide lawmman sang ber) award chu EF&CC Minister hian a hlan a, dawngtute hi Govt. Vengthlang Middle School atangin Lalruatfela, H. Lalmalsawma, Linda Lalnunmawii, Lalbiakkimi leh Hmingthanzuali te, Govt. Comprehensive Middle School, Venglai atangin Lalrinchhana, Lalvenhima, Samuel Chinbiakthanga, Chingngaihzovi leh Lalduhawmi te, Govt. Kanan Middle School atangin Lalnuntluanga, Thangkhupmuana leh Zenngaihliani te an ni.

MLA Er. H. Ginzalala chuan Independence Day puala Inter Office Badminton intihsiaknaa titha te leh chess intihsiaknaa titha te hnenah lawmman a sem a, lawmman latute chu

BADMINTON

Gazetted Officers Doubles
Champions - Vanlalpara leh Lalrongura (DCIO)
Runners Up -Larry Lalbiaktluanga leh H. Zahmingliana (DRDO)

Womens Doubles
Champions - Lalrinhlui leh C. Lalnunpuii (Education)
Runners Up - Cicily VL Ruatpuii leh VLH Zuali (Govt. Champhai College)

Mens Doubles
Champions - CS Lalrongura leh Malsawmsanga (All India Radio)
Runners Up - Lalchhuansanga Sailo leh F. Lalnunpuia (District Court)

CHESS

1-na: Lallianmanga
2-na: Lalnienga
3-na: C. Lalremruata

MLA Lt. Col. Clement Lalhmingthanga'n pool intihsiak leh slogan insiamsiak lawmman a sem a, lawmman dawngtute chu:

POOL

1-na: Joel Vanlalhriatrenga
2-na: John Lalthanpuia

SLOGAN

1-na: Lianhuaikimi, Govt. Kanan Middle School
2-na: H. Lalhmingmawia, Govt. Tlangsam Middle School
3-na: Lalpanhlui, Govt. Kanan Middle School

Chhangphut Field-a hun hman zawh hian, Circuit House-ah sawm bik te pualin ‘VIP at Home’ hman a ni bawk.