1690/2025-2026

Lawngtlai, 15th August 2025 : Vawiin khan Prof. Lalnilawma, Disaster Management & Rehabilitation changtu Minister chuan Lawngtlai Chandmary leh Bazara chenna in chimta leh Lawngtlai- III a lei tlahniam chu a hmunah kalin a enfiah a. Minister hi a veng neitu VC leh YLA hruaituten an lo dawngsawng a ni.

Prof. Lalnilawma chuan May ni 30, 2025 zân a ruahsur nasa avanga Chandmary leh Bazara Venga  chenna In chân tate chu thinlung takin a tawrhpui tih a sawi a.  Building chim avanga tangte him dam taka lakchhuah vek  an ni chu lawmawm tiin, chhanchhuah hna thawktute an fakawm tak zet a ti. DM& R Minister chuan sawrkarin an harsatna tawh a hriatpui tih sawiin, theih ang ang a hmalak a nih thu a tarlang a ni. Lawngtlai - III lei tlahniam a tlawhnaah Minister chuan an harsatna tawh a lo hriat tawh thu a sawi a. Lei tlahniamin a huam chin a zau avangin sum leh pai tam zawk seng a ngai dawn tiin, Sawrkarlaipui hnenah tanpuina sum tam zawk hmu tura hmalak mek a ni, a ti.

Prof. Lalnilawma chuan Lairam Rescue Centre - a tlawh nghal a. Ruihhlo ngaite chhanchhuak tura an inpekna fakawm a tih thu a sawi a. Ram leh hnam tana an rawngbawlna ropui a tih thu tarlangin, tha hnem ngai taka thawk zel turin a ngen a ni. Lairam Rescue Centre- in mamawh an neih hrang hrangte a enfiah nghal a. Tun  dinhmuna an mamawh em em  tui thianghlim khawlna tur (Tanky ) leh Retaining Wall- te chu ngaihpawimawh hmasak a tul hle  a ti a. PHED leh DM&R lam atanga tanpuina awm thei ang angte lo bawhzui a nih tur thu a sawi . Prof. Lalnilawma chuan Lairam Rescue Centre - hnenah hian tanpuina cheng 10,000 a hlan nghal a ni.

Lairam Rescue Centre- ah hian Thawktu- 13 awmin,  mipa - 18  an enkawl  mek a ni.

Minister hi Pu V. Lalengmawia, Addl. Secretary, RD&A, Er. Lalropuia, Chief Engineer, PHED, leh Er . Lalsanga, SE, PHED, Lunglei,  WATSAN Circle,  ten an tawiawm thei a ni.