India rama Postal Network zau tak hmang tangkaia thingtlang kilkhawr ber thlenga financial services pek theihna tura sawrkar laipui duan India Post Payments Bank hawnna chu India hmun dang rualin vawiin chawhnu khan Champhaiah neih a ni.

Hawnna hun Venglai Community Hall, Champhaia neihah khuallian Pu Liansangzuala Chhakchhuak, Additional DC Champhai chuan mipui mimir leh thingtlang khaw kilkhawr berte hnena Bank services chhawpchhuah saktu tur IPPB Champhaia hawn a ni tur chu lawmawm a tih thu a sawi a. Sorkar scheme ngaipawimawha kalkhawmte chu fakawm a ti a. IPPB Service hmangin kumin chhung ngeiah India ram Post Office zawng zawngah Bank Services kalpui hman tum a ni tiin, mipuite chu Banking system thang zelah hamthatnate dawng thei ve ngei tura Bank account hawn tum theuh turin a chah a. Dak lama thawktute pawh hna a tam sawt dawn avangin leh IPPB din chhan hrereng chunga ngawrh leh zuala thawk turin a chah a. Champhai District chhunga Sub-Office leh Branch zawng zawngah banking services kalpuia tangkai taka hman anih theih nana duhsakna hlan chungin a hawng a ni.

He hunah hian Pu C. Vanlalzawna, SPM Champhai Sub-Office chuan kalkhawmte lawmna thu a sawi a. Pu Patrick Sian Pianga, SPO chuan IPPB awmzia sawifiahin, IPPB chu tun dinhmunah Bank puitling la ni lo mahse tun atanga kum 4-5 velah Bank puitling changtlung tak khawvela Banking services lian ber pawl nipha tur a ni, a ti a. India ram mihring za zela 20 Banking service la khawih ve lo a, a bik takin thingtlang lama khawsaten an chhawr tangkai dawn thu a sawi a. Post Office leh dak hmanga service theihnaahte chuan kalpui vek tuma hmalak a ni, a ti bawk.

India Post Payments Bank hi Sawrkar laipuia Department of Posts (DoP), Ministry of Communication kalpui Public Sector Company niin 100% Government entity, Reserve Bank of India hnuaia inziaklut a ni a. India Postal Services hian thingtlang kilkhawr ber a hrut phak avang leh hnathawktu pawh mi nuai 3 dawn thingtlang lamah a neih avangin Post Office 1,54,000 hmanga mipuite hnena financial service pek chu a remchang hle a ni. IPPB hmang hian Savings account, Current account te a hawn theih dawn a, 4% fixed interest rate saving account-ah a awm a. Quik Respond Card siam ani anga, Money transfer, Direct Benefit transfer, Bill & Utility payments, Enterprise and Merchants Payments leh RTGS, IMPS, NEFT services hmanga fund transfer pawh a theih dawn bawk a. Mobile App download theih a ni dawn a, bank account detail check theihna turin SMS Banking a tih theih dawn bawk a ni.

India Post Payments Bank hawnna pui ber hi vawiin chawhnu khan New Delhi-ah neih niin, Prime Minister Narendra Modi-an a hawng a. Mipui ban phak mahni kawtkai ngeiah Dak lama thawktute hmanga Bank services tih theihna tur a ni a. Tun dinhmunah India ramah Post Office 154000 awm mekin heng zinga za zela 90 vel hi thingtlang lama awm a ni a. Heng Post Office leh Branch zawng zawngah hian kumin December Ni 31, 2018 ral hma ngeia India Post Payments Bank (IPPB) hi kalpui hman tum a ni a. Tun dinhmunah Champhai Sub-Post Office hnuaiah hian Branch Post Office 23 a awm mek a ni.