Vawiin khan India ram pumah a ruala India Post Payments Bank (IPPB) hawnna hun hman a ni a. IPPB, Aizawl Branch hawnna hi Lal Thanhawla Auditorium-ah neih a ni a, Mizoram Governor leh Khuallian ni bawk Pu Kummanam Rajasekharan chuan a hawng a ni.

Pu Kummanam Rajasekharan chuan Department of Posts-in sawrkar laipui puihbawmnaa ama puala Payments Bank a hawng ta hi hmasawnna lian tak a ni, a ti a. Mipui nawlpui chhawr phaka bank service hnuh hnaih kawnga Prime Minister Pu Narendra Modi thawhrimna rah a nih thu a sawi a ni. Governor chuan tunlai khawvel thiamna leh internet tangkaina thang zelah, inbiakpawhna a awlsam tawhin, khawvel pawh a zim sawt hle a, chuvang chuan he ‘digitised’ khawvelah hian tumahin hnufual bik nih an duh lo a ni, a ti. IPPB thil tumte chu mi tam takin an tangkaipui tur thu a sawi a, ram hmasawnna atana rahbi pawimawh tak a ni tiin, hmalam hun eng leh beiseiawm tak min siam dawn a ni, a ti. India Post Payments Bank chuan financial literacy hmangtein mipuiin bank service an chhawr tangkai theih dan turte leh savings pawimawhnate a zirtir theih tur thu a sawi a. India Post Payments Bank thupui au hla, “Aapka Bank, Aapke Dwaar” (I bank, I in kawtah ngei) tih chu a taka a thlen ngei a beisei thu a sawi bawk a ni.

Postmaster General NE-I, Aizawl  Pu T. Mang Min Thang pawhin ramin hma a sawn dawn chuan, a khua leh tui ten eng eizawnna pawh nei mahse, hmasawn thei tura remchanna an neih chauhin hma a sawn thei a ni, a ti a. Banking leh payment lama thiamna sang zel kara  India Post Payments Bank pawh hawng tura thutlukna siam a nih thu sawiin, he Payments Bank kaltlang hian India khua leh tui ten bank rintlak, technology thar leh changkang ber ber  a thuam, dawr awlsam, inzar pharh tha leh mi inpe zo te enkawl an chhawr tangkai thei dawn a ni, a ti. India ramah mi 22% te chu Below Poverty Line (BPL) hnuaia khawsa an ni tiin, an ni bakah mi thahnem takin bank service chu an chawr theih loh thu a sawi a. IPPB chuan bank remchanna la chhawr ve lo te tan an kawt kaiah bank service a pek tur thu sawiin, Mizo mipui te rilruah savings pawimawhna a tuh dawn a ni, a ti bawk.

Vawiin khan India ram pumah branch 650 leh access point 3250 hawn a ni a. Prime Minister Pu Narendra Modi chuan Talkatora Stadium, New Delhi-ah hawnna hun hmangin, a hawnna hi live telecast-in Lal Thanhawla Auditorium-ah pawh thlirho a ni. Khuallian Pu Kummanam Rajasekharan chuan IPPB Aizawl Branch chu a hawng a, ‘Special Cover on Financial Inclusion’ tih lehkhabu a tlangzarh nghal a ni. He bank hawn thar a account neitute hnenah QR (Quick Response) Card a sem bawk a ni.

Vawiin khan Mizoram hmun hrang hrangah branch 6 leh access point 24 hawn a ni a. Kumin kum tawpah Mizoramah branch 39 leh access point 344 hawn hman a nih tur thu tarlan a ni bawk.