No.2296/2020-2020

Dated Champhai, the 22th June 2020 (Monday): Vawiin khan Champhai khawpui chhunga inkharkhipna dan tum sarihna Lockdown 7.0, June Ni 23, 2020 atanga June Ni 30, 2020 thleng awh tur  kalpui dan tur  leh District Level Task Force on Covid-19 (DLTF) kaltlanga tanpuina sumfai dawn hman dan tur chungchang DC Conference Hall-ah Bawrhsap Pi Maria C.T Zuali  hova rel a ni. Meeting-ah hian Pu Rex Zarzoliana SP, Pu Mark Lalthanliana  Addl DC, Pu Lalnunfela Chawngthu SDO Sadar, Incident Commander-te, Nodal Officer-te,  District  VC Association,  MJA leh YMA  aiawh theuhte an tel a ni.

Bawrhsap leh Champhai District Level Task Force on Covid-19 Chairman nibawk Pu Maria C.T Zuali chuan  lockdown kalpui chhunzawm zel chuan nunphung ti khaihlak phah viau rih mahse, lockdown tum 7 na kalpui turah thukhat vuaa lungrual taka kal ho zel angai dawn a ni, a ti a. Lockdown pawhsei chu mipuite hnena harstna thlen tumna a ni lova, kan zavaia that tlanna tur leh him tlanna tura sawrkar duan ani tih hriaa  dan leh dun zamte zawm theuh turin mipuite a chah a ni. 

Pu Mark Lalthanliana, Addl DC hnen atangin District Level Task Force on Covid-19 in tanpuina a dawn hrang hrangte ngaihthlak a ni a.  Vawiin thlenga Champhai District Level Task Force on Covid-19 hnena tanpuina sumfai lut tawh chu Rs 5,85,100/- anih thu sawiin, hman ral tawh zat chu Rs 1,96,475/- niin, sum hman bang la awm chu Rs 3,88,625/- anih thu a sawi a. Heng bakah hian sumfai nilo tanpuina hrang hrang,  chawhmeh, Covid-19 dona hmanrua leh a dangte pawh dawn nual anih thu a tarlang bawk. 

Meeting chuan DLTF hnena tanpuina sumfai, chawhmeh leh hmanraw dangte  thawhtu mi thilphal leh inpe tak takte chungah thinlung takin lawmthu a sawi a. Tanpuina sumfai tlingkhawm la kawl mek Rs 3,88,625/- atanga Rs 2,00,000/- chu ramri ven leh tul hrang hrangte thawk mektu  Sub-Hqtrs YMA (SYMA) Champhai hnena hlan nise a ti a. Thukhawm chuan Pu Biakliana, Khuangphah khua YMA Information Centre-a duty lai vanduaithlak taka damlohna avanga botalta ral nan DLTF hmingin Rs 10,000/- pek nise a ti bawk. Heng baka sum hman loh la awm Rs 1,78,625/- chu a tul ang zela hman nise tih a ni. 

Lockdown tum sarihna kalpui dan tur chungchnag pawh rel chhunzawm nghal niin, Pu Lalnunfela Chawngthu, SDO (Sadar) in State Guidelines zulzuia Champhai khawpui tana inkaihhruaina dan siam chhin chu chhawpchhuakin a sawifiah a. Uluk taka ngaihtuahhoa siam that ngaite thawmthat anih hnuah pawm a ni a. Hemi hun chhung hian zan dar 7:30 leh zing dar 4:30 inkarah mihring leh motor chhuah khap tlat a ni ang. He Total Lockdown hian Champhai khawpui chhung (Town area) bik a huam dawn a ni. 

Vawiin thurelte bawhzuiin District Magistrate Pi Maria C.T  Zuali chuan Government of Mizoram, DM&R Order No B.13021/101/2020-DMR/Pt-III Dated 21th June 2020 chu District level-ah pawh hman ve nghal tur anih thu leh hemi bakah hian  Champhai khawpui huamchhung bika Total Lockdown kalpui dan tur chu a hnuaia tarlan ang hian hriattirna a ti chhuak a ni.

 A.            Hnathawh chungchang:

1.            Hmasawn nana hmalakna hnathawh (Department works) leh mimal eizawnna hnathawhna (Brick leh chow siamna, bakery, furniture works, workshop etc) chu phalna hranpa lak ngai lovin kalpui theih a ni. Amaherawhchu ram chhunga awmsa labour-te chauh ruaia thawh tur a ni. Hnathawktu ten ‘SOP on Social Distancing’ zawm chungin hna an thawk tur a ni. Hnathawhna hmun ah mi 5 aia tam awm khawm phal a ni lo.

2.            In sakna leh hnathawhna kal lai mek pawh an thawh loh avang a chhiatrupna thleng thei thil leh tul zual bik thil a awm anih chuan VLTF te’n DC ah recommend siam in DC atang a permit la in thawh chhunzawm theih a ni ang a, hnathawhna hmunah hian mi 5 ai tam thawh loh tur a ni. Tul bik thila mi 5 aia tam thawh a tul pawhin VLTF hriatpuina in inhlat takah hmai tuam chungin an thawk tur a ni.

B.            Tiau kam Balu lak chungchang:

Tiau kama Balu la duh an awm a nih chuan an Balu lak tumna area VLTF te’n recommend-na siamin DC atang chauhin permit lak theih a ni ang. Permit-ah hian motor number leh a kal turte hming leh address ziah lan tur a ni a. Motor pakhatah driver tiam lovin mi 3 bak kal phal a ni lo ang.

 C.            Bazar/Dawr hawn dan tur chungchang:

1.            Bazarpui chu khar chhunzawm tur a ni a, Chawhmeh bazar hi mahni VC area theuhah a hranpa in siam theih a ni ang a, chawhmeh zuartuten mahni veng area theuhah inpho/zawrh tur a ni. Amaherawhchu inkarhlat takah seat siam tur a ni a, a dawrtute pawh inkarhlat tak (feet 6 ai hnai lo) ah awm zel tur a ni. Thlai zawrhna hmun hi hmun zawl zau lai – School kawt zawl, inkhelhna field tual emaw ni thei se. VC ten thlai/chawhmeh zawrhna tur an ruahmanna hmunah chauh zawrh tur a ni.

2.            Chawhmeh, thlai leh thei te, in lama pek (home delivery) phal a ni.

3.            Zing dar 8 atanga tlai dar 5 thleng (Thawhleh, Nilai thawhtan leh Inrinni) heng dawrte hi hawn theih a ni ang – Eichawp dawr, Insakna bungrua (Hardware leh Electrical goods) zawrhna.

4.            Zing dar 8 atanga tlai dar 5 thleng (Thawhtan, Nilai leh Zirtawp) ah a chung a tarlan bak zawng dawr dang  hawn theih a ni ang.

5.            Mihring, Ran damdawi dawr leh Agriculture kaihhnawih zawrhna dawr erawh chu kartluanin hawn theih a ni ang.

6.            Dawr hawn theihin a huam zingah hengte hi a tel lo – Restaurant leh Thingpui dawr, Spa, Beauty Parlour leh Khawlaia inpho dawr (Street Vending) te. Khawlaia inpho tih hian VLTF ten khawlaia chawhmeh bazar an siam a huam lo ang.

7.            Dawr neitu ten an mahni dawrtute feet 6 aia hnai lovah an awm vek tur a ni a, rinbial an siam vek tur a ni.

8.            Dawr nghaktu hi mi pathum aia tam awm phal a ni lova, dawr nghaktu zawng zawng ten hmai an tuam ngei ngei tur a ni.

9.            Eisiamna Restaurant/Hotel in Home delivery in an thil siamte chu an awmna veng  VLTF recommend hnuah DC phalnain sem chhuah theih a ni ang a, a sem tute hian DC atangin movement permit an nei tur a ni. 

D. Zin veivah leh mipui chet vel chungchang:

1.            Champhai Town Area chhungah Lirthei hmanga chhuah vah khap tlat a ni. Hei hian Sorkar hnathawk duty motor-te, ambulance leh medical/veterinary emergency-a hman motor-te, Sorkar leh private hospital-a thawkte motor, essential commodities phur motor, bank hnathawkte office kalna motor, telecom service duty-na motor, print & electronic media mi te motor, kohhran hminga motor register-te, bawlhhlawh paih motor, bawnghnute phurh/semna motor-te, damlohna leh chhiat tawhna thila chhungkhat hnaivai (pi leh pu, nu leh pa, tu leh fa leh pianpui unau) te veivahna leh VLTF duty-te lirthei leh phalna neia bungraw phur motor-te a huam lovang.

2.            District pawn lam leh District chhung Champhai khaw pawn kal phalna chu VLTF te recommend na in DC leh Incident Commander-ten phalna an pe thei ang. Hei bakah hian online in mobile apps mCOVID-19 atangin dil theih a ni bawk ang.

3.            Champhai khawchhung lut tur nilo, District chhunga thingtlang khua veivahna tur chu VLTF ten phalna an pe thei ang.

4.            Thingtlang atanga mamawh lam tur leh thil pawimawh tul zual bik avanga Champhai khaw chhung kal ngaite chuan VLTF recommend-na in an bialtu Incident Commander-te hnenah phalna an la tur a ni. Dilna hi Phone leh Whatsapp kal tlangin dil theih a ni ang.

5.            Tul bik thil heng - chhiat tawh, damloh leh eizawnna thil pawimawh bik anih loh chuan zin veivah loh tur.

6.            District headquarters atanga bungraw thiar chhuak tur leh la lut turte chuan DC atangin phalna an la hmasa zel tur a ni. Hei hian Essential commodities phurte a huam lovang.

E. Mipui Vantlang tana Inkhuahkhirhna Hriattur te:

1. Hemi hun chhung hian mi 5 aia tam punkhawm khap tlat a ni. Hei hian Inneih inkhawm leh Mitthi vui program a huam lovang.

2. Champhai khawpui chhungah phalna neilo te chu tumahin mahni in leh compound an chhuahsan tur a ni lo. Hei hian a hnuai ami te hi a huam lovang:

3. (a) Hminghmerha duty tur a ruat (detailment order nei) sorkar hnathawkte office kal leh haw. Sawrkar hnathawk motor duty-a hmante hian Office ID emaw Detailment Order an keng tel thin tur a ni a, an motor-ah chiang takin an thawhna department hming an tarlang tur a ni.

(b)  Medical leh Veterinary emergency duty leh hospital-a thawkte

(c). Bank, insurance, ATM, Postal, telecom service provider hnathawkte

(d) Print & Electronic media, cable leh internet service a thawkte

(e) Bawnghnute sem leh bawlhhlawh paih

(f) Petrol pump leh LPG delivery a thawktute

(g) Supply Department, Agriculture leh Horticulture Department-a thawkte

(h) Courier, Home delivery leh E-commerce service-te leh (Heng mite hian an veivahna tur Movement Permit DC office atangin an nei tur a ni)

(i) MSACS hnuaia ART, OST leh Syringe needle exchange kalpui tura ruat bik NGO member-te, an hna an thawh ni atan chauh. Hengte hian an ID card leh an duty order an keng tel ziah tur a ni.

(j) Pastor, Kohhran Upa leh rawngbawltute tul bik thila kohhran rawngbawlna hna thawk tura ruat bikte. Hemi atan hian Kohhran lehkha an keng tel tur a ni.

(k) State leh Central Board hnuaia class X leh XII board examnination ni 1/7/2020 atanga tan tur buaipuitu Official, Zirtirtu leh Zirlai exam turte leh an kal velna Lirtheite. Zirlaite tan admit card leh Official/Zirtirtu te tan duty tura detail-na order ken tel tur a ni.

(l) Lirthei hmanga chhuak turte chuan Superintendent of Police, Champhai hnenah lirthei tlan phalna an la tur a ni. Loh theih loh thil heng – Damlohna leh thihna, damdawi lei, buhfai/ration lak, chawhmeh leh ei leh bar lei tura chhuah, Lo/Huan/Leilet a hnathawk  avanga pawn chhuah na tura lirthei kalna chu, mahni bialtu Incident Commander/Executive Magistrate emaw VLTF-ten phalna an pe ve thei ang. Hei hi Champhai Town area tan bik a ni ang.

F. Sawrkar Office chungchang: Sawkar Office hawn leh kal dan tur chungchang chu State Guidelines in a tarlan ang a kalpui tur a ni. 

G. Lo/Leilet/Huan a feh chungchang:

1.            Feh turte chuan silai leh nungchate suat theihna tur hmanrua engmah an keng tur a ni lo.

2.            Feh turte chu VLTF te’n permit an siamsak tur a ni a, permit ah chuan an hming, address leh an fehna hmun tur (lo an neihna hmun) leh an feh ni (date) ziah lan tur a ni.

3.            Mahni area pawn lam a feh turte chu an va fehna tur hmun a VLTF te hnenah an permit nen an in report tur a ni a, permit neite chu harsatna siamsak loh tur a ni.

4.            Feh hun hi kal hun leh haw hun mumal takin VLTF ten siamsak tur a ni. Feh/Loa kal te hi an haw hunah VLTF te hnenah an in report tur a ni.

5.            Nitina feh tur chi leh riak tur chite chu permit-ah thliar hran tur a ni.

6.            Champhai khawchhunga mi, feh turte chuan zing dar 4:30 atanga zing dar 9:00 inkarah khawpui an chhuahsan fel hman tur a ni a, tlai dar 5:00 atanga dar 7:30 inkarah an in lam an haw thleng fel leh tur a ni. Hemi hunbi vawng thei lote tan chuan fehchhuah phal a ni lo. Khaw dang zawngah chuan huan lo ram chungchangah khuahkhirhna a awm lo ang.

H. Pawimawh dangte:

1.            Tupawh khawlaia chhuakte reng reng VLTF duty-te tiamin hmai an tuam ngei ngei tur a ni a, feet 6 aia inhnaihin tumah awm loh tur a ni.

2.            Lockdown chhung hian mi 5 (panga) aia tam punkhawm khap tlat a ni.

3.            Tul bik thil - damdawi lei, buhfai/ration lak, chawhhmeh leh ei bar lei tura chhuah lawk – tih loh ah chuan tumahin mahni in leh compound an chhuahsan tur a ni lo.

4.            Tuman khawlaiah chil chhak loh tur, a tilui chu dan ang a hrem tur an ni.

5.            Mi panga (5) aia tam punkhawmna heng - Inneih lawmna (reception), lungphun, anniversary leh birthday lawmna, games & sports, book release, politics leh pawl thil a kalkhawmna, intihhlimna chi reng reng te he hun chhung hian huaihawt phal a ni lo.

6.            Inneih inkhawm, mitthi vuina leh khawhar inah mi 35 aia tam pun khawm phal a ni lo.

7.            Loh theih loh thil a nih loh chuan, kum 65 chin chunglamte, taksa hriselna lama harsatna nei sa te, nau paite leh naupang kum 10 hnuailamte mahni inchhungah inkharkhip vek tur a ni

8.            VLTF duty-naah Post tinah mi 5 aia tam duty loh tur a ni a. Upa Pawl member-te chu duty tir loh nise.

9.            Zan dar 7:30 leh zing dar 4:30 inkarah mihring leh motor chhuah khap tlat a ni. Thupek zawm lo te chu IPC Section 188 hmangin hrem tur an ni ang. Hei hian Covid-19 duty, phai atanga essential commodities leh Home department-in a phal bungraw phur/unload tute leh DC in a bik a phalna a pekte a huam lo ang.