Entrepreneurship Development Centre (EDC) Mizoram, Planning & Programme Implementation Department, Govt. of Mizoram leh Entrepreneurship Knowledge Cell (EKC), Govt. Champhai College tangkawp buatsaihin vawiin atang khan Govt. Champhai College Multipurpose Hall-ah ni hnih awh tur ‘Innovative Challenge on Business Solution to Sustainable Development Goals’ tih thupui zirchianna leh inelna neih a ni. He programme district puala a tawpna turah hian Champhai Bawrhsap Pu Mark Lalthanliana, MCS chu khuallian niin he zirchianna leh inelna ni bawk hi a hawng a ni.

Khuallian Pu Mark Lalthanliana chuan Champhaia Entrepreneurship kaltlanga inzirtirna leh inelna hun tha tak buatsaih ani chu lawmawm a tih thu a sawi a. Sawrkar hna leh hna dang thenkhatin mi zawng zawng a daih loh avangin hmathar la a eizawnna tlak hna kan zawn ve zel angai tawh a ni, a ti a. Entrepreneurship chu taihmakna leh tumruhna hmanga thil thar leh chona thar kalpuina anih thu a sawi a. Sumdawng zawng zawngte entrepreneur an ni veklo a, entrepreneur zawng zawngte erawh sumdawng an ni, a ti bawk. Entrepreneur hlawhtling ni tur chuan mi taima, thiamna leh mi hipna riau nei thei tur zawnga ngaihtuahna seng thiam mi nih angaih thu a sawi a. Kalkhawmte chu mite tih dan aia danglam leh midangte hip thei tur zawnga ruahmanna felfai tak siama hmala turin chah a. Hun tha tak leh hlawkthlak tak hmang tura duhsakna hlanin a hawng a ni.

Hawnna hunah hian Pi Saidingpuii Sailo, Project Assistant, Entrepreneurship Development Centre (EDC) hnen atangin District Innovative Challenge neih anih chhan leh hmachhawpte ngaihthlak a ni a. Heng bakah hian EDS awmzia leh nihphungte a sawifiah nghal bawk a, district dangahte hlawhtling taka kalpui tawh anih avangin Champhai District chu nasa zawka tang turin a fuih nghal bawk a ni.

He hun kaihhruaitu Pu P.Lalhmingliana, Principal, Govt. Champhai College chuan kalkhawmte lawmna thu sawiin, Entrepreneurship lama tuimi leh a ngaihna hria kal zel duhte tan sawrkar chu zau taka a in hawn reng thu a sawi a. Pu R.Lalchhuanawma, Working Chairman, EK Cell, Govt. Champhai College chuan Champhai College-ah Entrepreneurship Knowledge Cell chu nikum lamah din anih thu leh fund dawn tawh hmanga a hma thei ang bera hmalak tum anih thu a sawi a. Ni hnih chhung chauh nilo nakin hun zelah ko ri tuh se a duh thu sawiin hawnna hun hi a khar a ni.

He hunah hian Champhaia Entrepreneurship lama tuimi te, College Zirlaite leh Zirtirtute an tel a ni.

Innovative Challenge on Business Solution to Sustainable Development Goals kaltlang hian khawtlanga harsatna leh mamawh awm theite zawnchhuaha, a sutkian dan turte ngaihtuahchhuaka ruahmanna insiam siak a ni dawn a, inelna hmanga tithate lawmman siam sak an nih mai bakah district aiawh inlenaah an tel thei dawn a ni. Khawtlang harsatna sutkianna, ram hmasawnna leh sumdawnna atana hmathar lakna ni bawk si chhawpchhuak thei tura inelna a ni.

He Innovative Challenge-ah hian a ni khatna vawiin lamah hian hmasawnna ngelnghet leh rualkhai nei tura hmathlir (Sustainable Development Goals) 17 behchhanin khawtlanga harsatna leh ngaih pawimawh zawng sawina hun minute 3 chhung hawn a ni a. Endiktu te'n heng zinga harsatna ngaihtuahho tlaka an hriat thlang chhuakin, harsatna awm tarlangtu te chu team leader an ni nghal dawn a. Team leader-te hnuaiah hian a tel zawng zawngte chu team hrang hrangah inthen darhin, an team leader-in harsatna a chhawp chhuah chu ching fel tur leh sumdawnnaa an chantir theih dan an sawi ho leh ang a. Harsatna chin fel dan tur ruahmanna chu ni hnihnaah minute 10 chhung judge-te hmaah an sawifiah leh hnuah endiktute’n a titha an thlang chhuak tawh dawn a ni. He Innovative Challenge-ah hian a ti tha ber team-in Rs 30,000/- dawngin, pahnihnain Rs 20,000/- leh pathumnain Rs 10,000/- an dawng dawn a. A tel zawng zawng hnenah participation certificate leh pawisa fai pek a ni bawk ang.