Ni thum awh tur Sustainable Development Goals (SDG) Conclave 2020: Partnerships, Cooperation and Development of North Eastern states, Assam Administrative Staff College, Guwahati a NITI Aayog in a buatsaih chu nimin (24.2.2020) khan tan a ni a. Mizoram Chief Minister Pu Zoramthanga pawhin he hun hi a telpui a ni.

India hmarchhak state Chief Minister hrang hrangte leh sawrkar laipui leh state sawrkar a mipawimawhte, international organization aiawhte leh zirmite kalkhawmnaah hian Chief Minister Pu Zoramthanga chuan Sustainable Development Goals thiltum te chu Mizoram leh hmarchhak state te tan pawimawh tak nia a hriat thu sawiin, Mizoramah pawh hmasawnna changtlung leh entawntlak siam turin state sawrkarin hma a lak dan a sawi a. Hmasawnna kan mamawh rualin kan chenna leilung, thing leh mau, ramngaw leh nungcha tichereu lo zawnga hmalak a tul thu a sawiin Mizoram chuan sik leh sa nuam tawk, ruahtui duhthusam leh thlai chi hrang hrang that duhna leilung a nei tih sawiin chu chu kan thil neih hlu ber a ni a ti a. Mau leh Rua nasa taka chin tum a nih thu leh chu chuan state ei leh bar dinhmun a chawikan a beiseiawm thu a sawi.

CM Pu Zoramthanga chuan sawrkar laipuiin state pariatte dinhmun a hriat chianpui a, an puihna a pawimawh thu sawiin hmarchhak state pariat te hmasawnna hna thawhna tur 10% Gross Budgetary Support dah thin chu kimchang taka hmuh a nih a, tangkai thei ang bera hman chungchang te, NEC tichak zual tura secretariat thuamthat leh NEC leh DoNER hnathawh tur felfai taka thliar a pawimawh thu a sawi a. Externally Aided Project funding pattern pawh state in a tum ve tur 10% ni thin kha tihpun a nih tak avanga hmarchhak state te tan phur a rit phah tak thu leh, a hma ami anga state share chu dah let leh a tul thu te Pu Zoramthanga chuan a sawi bawk.

He Conclave hawnna inkhawmah hian NITI Aayog Vice Chairman Rajiv Kumar, CEO Amitabh Kant, India rama UN Resident Coordinator Renata Lok-Dessallien te leh Assam Chief CM leh Finance Minister te, Arunachal CM, Tripura CM leh Sikkim CM ten thu an sawi bawk a. Mizoram Chief Minister in Mau leh Rua chungchang a sawi hi DoNER Minister Dr.Jitendra Singh leh NITI Aayog Vice Chairman Rajiv Kumar te pawhin an phurpui thu leh nasa taka hmalak a nih tur thu an sawi bawk. Pu Zoramthanga hi Planning Department Secretary Dr.C.Vanlalramsanga leh PS ten an tawiawm a ni.

He Conclave technical session ah hian hmarchhak state a Sustainable Development Goals kalpui dan te, economy hausakna leh eizawnna ngelnghet siam te, sik leh sa inthlak mil a kuthnathawktute eizawnna kalphung her danglam te, hriselna chungchang leh adangte sawiho a ni ang.

Chief Minister hian nimin chawhnu a SDG Conclave hawnna leh sawihona a telpui hnu hian tukin khan Guwahati Mizo Association hruaitute nen an inkawm a. Tichuan vawiin chawhnu khan Mizoram Budget Session neihlai mek a telpui leh a ni.