1973/2024-2025

Champhai, 9th September, 2024: Vawiin khan District Programme Office, Women & Child Development, Champhai buatsaihin International Literacy Day chu I&PR Auditorium, Champhaiah hman a ni a. Champhai Bawrhsap Pu VL Remliana chuan khuallian niin he hun hi a hmanpui.

Khuallian Pu VL Remliana chuan zirna chu Mizote hnenah chanchintha hmangin pek a ni a, hei hian hmasawnna nasa tak a thlen a ni, a ti. Ziak leh chhiar thiamnain a tum ber chu finna, changkanna dik leh remhriatna nih thu pawh sawiin Bawrhsap chuan zirlai kalkhawmte chu an thiamna te chu hmasawnpui ngei turin a chah a. Thil zir leh chhiar chianna atan ni lo, mi sawisel nan chauha ziak leh chhiar thiamna hman chu thil dik a ni lo tih hre reng turin a chah bawk.

Bawrhsap chuan tunlai khawvel changkannain a ken tel Social Media atchilhna chu thalaite natna vei hlauhawm tak a nih thu sawiin Social Media aiin lehkhabu chhiar lama kir leh turin a chah a. Mi ten an hriatreng theihna turin zirlaite chu thuril thuk tak haichhuak a, sulhnu hriatreng tlak hnutchhiah tum turin a chah bawk.

Kumin International Literacy Day thupui atan hian  ‘Hmeichhe naupang Lehkha zir pawimawhna’ tih hman a ni a; International Literacy Day puala hun hman hi Pu Lalrinmuana, DPO chuan kaihruaiin Pu C Lalhrilliana, State Teacher Awardee leh Pi K Lalrinfimi, DHEW, DPO te pawhin thu an sawi a ni.

International Literacy Day pual hian Essay inziahsiak buatsaih a ni a. Zothansangi, Govt TM High School chu pakhatna a ni a, Zomuanpuia Zokhawthar Higher Secondary School chu pahnihna niin Rohmingliani, Holy Mission School chu pathumna a ni a, mi 3 hnenah Consolation Prize pek an ni bawk.