1972/2024-2025

Aizawl, the 9th September, 2024: Vawiin chawhnu dar 1:00 khan Home Minister Pu K. Sapdanga hovin kan hma lawka hunpui lo thleng tura dan leh thupek kenkawh dan tur chungchang leh, halpuah leh halmawi hrang hrangte khap dan tur chungchang Secretariat Conference Hall, MINECO-ah rel a ni.

Home Minister Pu K. Sapdanga chuan hriselna kawnga nghawng tha lo tak thlentu halpuah leh halmawi hrang hrang ven leh hemi ti lo tura mipui zirtir kawngah tanrual a pawimawh thu sawiin, hemi chungchang sawihona hun kum dang zawng aia hmaa neih a ni chu lawmawm a tih thu leh rah tha a chhuah ngei a beisei thu a sawi a. Dan bawhchhiate laka hremna lekkawh zel chu halpuah leh halmawi hal dona kawnga inzirtirna pawimawh tak a nih thu sawiin, kalkhawmte chu halpuah leh halmawi khap chungchanga ngaihdan leh rawtna an neihte inthlahrung hauh lova thlen turin a sawm a ni.

Chief Secretary Dr. Renu Sharma chuan hmun dangte ngaihtuahin Mizoram boruak chu la thianghlim zawk hle mah se vawnghim zel tura tanlak angai a, nakin zel atan boruak bawlhhlawh zel tur kan ven lawk a ngai a ni, a ti a. A hun taka chetlak a tul thu leh inzirtirna zau zawka kalpui a tul thu sawiin, Sawrkar mai nilo, kan zavaia tanrual a tul dawn thu a sawi bawk.

He hunah hian kum hmasa lama hmalak dante thlirlet a ni a. Tarlan a nih dan chuan nikum hunpui vuakvetah khan halpuah leh halmawi kaihhnawihah Police-in case 5 ziaklutin mi 9 an man a, an zinga 7 te hi thiam loh chantir an ni tawh a ni. Boruak bawlhhlawh leh bawlhhlawh loh tehna Air Quality Index (AQI) chuan halpuah leh halmawi hal vanglaiin a tehnaah 300 a hawlh kai a ni.

Home Minister hova thutkhawmah hian hunpui vuakveta dan leh thupek kenkawh chungchangah khauh lehzuala Sawrkar a kal dawn thu tarlan niin, halpuah leh halmawi lam chi reng rengte pawh khauh zawka khap nise tih a ni a. Mipuite hnena inzirtirna zau zawka kalpui dan turte ruahman niin, halpuah zuar leh halte report zung zungna tur siam leh nise tih a ni a. District tin Magistrate-te chu halpuah leh halmawi lam chi reng rengte khapna thupek chhuah tura hriattir nise tih a ni a. Veng leh khaw tinah tlangau hmangin ngenna siam nise, kohhran tawiawmna ngen ni bawk se, media platform hrang hrangte tangkai taka hman nise tih a ni a. State pawn atanga halpuah lakluh thin tihtawp (supply reduction) a nih theih nana khauh lehzuala hmalak dan turte sawiho niin, halpuah leh halmawi lakluh veng turin ramri dep entry point-a ngun taka duty insiam leh lirthei veivak endikte, online hmanga chah thin vente, Police leh YMA tang hova foot/mobile patrolling neih nise tih a ni a. Heng bakah hian thil pawimawh leh tul dangte sawiho a ni bawk. Meeting-ah hian Pu Vanlalmawia, Home Secretary; Pu Lalbiakthanga Khiangte, IGP (L&O); Er. Lalhriatpuia, DC Aizawl; Pu Rahul Alwal, SP Aizawl; Sawrkar Official dangte, Central Young Mizo Association, Aizawl City Local Council Association leh Mizoram Merchant Association hotute an tel a ni.