3786/2022-2023

Champhai, the 8th March, 2023: Vawiin chawhma dar 10 khan Circuit House Conference Hall, Champhaiah District Programme Office (DPO), Women and Child Development (WCD), Social Welfare & Tribal Affairs Department bultumin khawvel puma hmeichhiate ni, International Women's Day, 2023 puala hun hman a ni. He hun hi District Bawrhsap Pu James Lalrinchhana chuan khuallian niin a telpui a, inchhung khura hleihlenna tuar hmeichhiaten  harsatna an tawh hrang hrangte an thlen zung zung theihna tur Chhantu Apps a tlangzarh nghal bawk.

Khuallian Pu James Lalrinchhana chuan vawiina tlangzarh tak chhantu Apps chu Domestic Violence Act. bawhchhiatna a thleng tih kan hriat ruala chhantu pawimawh tak kan nih theihna tura thil pawimawh leh tangkai tak a ni dawn a ni" a ti. Mipa leh hmeichhiate intluktlanga kan kal theihna turin khawvel pum huapin hmalak a nih thu sawiin hmeichhiate thil tawrh leh paltlang tam takte sutkian a nih theihna tur te, mipa leh hmeichhiate dinhmuna inthliar hranna awm thin tih tlem te,  rokhawm chungchangah pawh mipa leh hmeichhia te dinhmun inthlau lutuk te her rem tura hmalak thin a ni' a ti a. Hnathawhna hmun hrang hrangah pawh hmeichhiate tan hmun him leh boruak tha buatsaih a tul thu sawiin, hmeichhia leh mipate intluktlanna kan kalpui chuan kan khawtlang nun a nuamin, inpawhtlanna thuk zawk kan nei thei dawn a ni', a ti a. Khawtlang leh ram rorelna thlenga hmeichhiaiin dinhmun pawimawh tak tak an chelh chu lawmawm a tih thu sawiin, eizawnna kawng hrang hrangah a fawng pawimawh chelhtu hmeichhe tam tak an awm zel chu hmasawnna ropui tak a nih thu a sawi bawk.

Pu James Lalrinchhana chuan mipa leh hmeichhiate intluktlanna chu khawvelin a ngaihpawimawh thu sawiin, mipa fa duhsak bikna awm thin hi kan dah bo a ngai a ni, a ti a. Khawvel hnam hrang hrang ten hmeichhiate an en dan a in an vek loh thu leh hnam dan leh kalphungte enchian a ngaih thu a sawi a.  Khawtlang leh ram siamthatnaah hmeichhiate an pawimawh em em a, hmeichhiate kan dah hniam chhung chuan kan changkang thei dawn lo a, chhungkaw nuam tak siam tur chuan hmeichhiate an pawimawh a ni, a ti bawk a. Hnathawhna leh awmkhawmna hmun apiangah hmeichhia ten boruak zalen an neih theih nan mipate an pawimawh thu pawh tarlangin, nitin mai hi hmeichhiate ni ah i siam ang u, tiin kalkhawmte chu a chah a. Hmeichhia harsatna tawk ten an harsatna tawh chungchang an thlen zung zung theihna tura duan tlangzarh tak, Chhantu Apps chu download vek turin hmeichhiate a chah a. Khawvel chu khawl thiamna digital hmanga kal a nih tawh thu sawiin, Chhantu Apps hmanga engkim inhriattir zung zungna chuan hmalatute tan pawh awlsam zawkna siamin, rang zawkin hma an la thei dawn a ni, a ti bawk.

Pi K. Lalrinfimi, Protection Officer chuan Domestic Violence Act chu hmeichhiate tana duan a nih ang taka hmang ngam turin hmeichhiate a chah a, in chhung khura pasalte leh chhungte kut tuar thin hmeichhia tam takin dan anga ro rel an ngam thin loh avangin harsatna lian tak tak a thlen tawh thu a sawi bawk. Chhantu Apps chu harsatna tawktu chauh ni lo, harsatna tawk hriate tan pawha tanpuitu nih theihna a nih thu sawiin, a tha lo lam zawnga hmang lova, dik leh tangkai taka hman tur a nih thu a sawi a, Domestic Violence Act la hre chiang lo te tan pawh Application chhungah chhiar theih a nih thu a sawi a. Hmeichhiate chu harsatna an tawh changa thupbo mailo tur leh thuneitute hriattir zel turin a chah bawk.

He hun hi Pu Lalrinmuana, District Programme Officer, Women and Child Development chuan a kaihruai a. International Women's Day, 2023 ah hian thupui atan, 'DigitALL: Innovation and Technology for Gender Equality/ Hmasawnna thil thar leh khawl hmanga thiamnate hmeichhia leh mipa intluktlanna atan' tih chu hman a ni. Vawiina tlangzarh tak Chhantu Apps hi Playstore-ah download theih a ni.