2366/2022-2023
Champhai, the 18th October, 2022: Sawrkar Laipui Ministry of Education ruahman angin National Kala Utsav Competition 2022-2023, hnam ziarang chawinun/chawisanna tura intihsiakna chu vawiin khan Samagra Shiksha, Champhai District buatsaihin Education Training Hall, Champhaiah neih a ni.

National Kala Utsav Competition intihsiakna tan hma hian inkhawm tawi Pu H.Darhmingliana, Dy, DPC (E) kaihruaiah hian Pu TT Laltanpuia, DEO & DPC Samagra Shiksha chuan kalkhawmte lawmna thu sawiin, zirna inah hnam ziarang chawinunna tur Kala Utsav buatsaih a ni chu lawmawm a tih thu a sawi a, hnam ziarang mual liam mek khaichhuaka tungding leh tu tur chu Kala Utsav hi a ni, a ti a. Mi thenkhat tana harsa em em performing arts avangin artist-te an hlu a, haichhuah an ni tur chu lawmawm a tih thu sawiin, mihring nun tilawma lungngaihlai pawha min hnemtu arts tel lovin hringnun a kim thei lova, chuvangin inthlahrung lova an thiam leh theihnate pholang ngam tur leh Champhai District chhunga talent nei tha inphumrute pen chhuak turin kalkhawmte a sawm a ni.

He hunah hian zai, rimawi tum, lam, kut themthiam thil entir leh hnam infiamna hrang hrang hmangtea intihsiakna neih a ni.

Kala Utsav Competition-ah hian Mizoram aiawha tel turte hi a hmain District Level-ah intihsiakna neih hmasak a ni a, District Level ti thate hian he intihsiaknaah hian Mizoram ai an awh dawn a ni.

Champhai District bik Kala Utsav hmanna hi tlai dar 3 khan kharna hun neih nghal a ni a. He hun hi Pu H.Darhmingliana, Dy, DPC (E) chuan kaihruaiin lawmman sem a ni a. Pu H. Lalhminghlua, Addl. DPC chuan lawmthu sawiin hun hi a khar a ni.