2367/2022-2023 

Aizawl, 18th October, 2022 : Dr Eric Zomawia, Mission Director, NHM chu Geneva, Switzerland a 18 - 20 October 2022 chhunga khawvel pum huap cancer khawmpui lian 'World Cancer Congress' ah a tel.

World Cancer Congress hi UICC(Union for International Cancer Control, Geneva) huaihawt a ni a, International Conference Centre, Geneva ah 18th October khan neih țan a ni. Khawvel hmun hrang hrang atangin Cancer lama inhmang delegates 2000 zet an kal a ni. Dr Eric Zomawia hi Mizoram Population Based Cancer Registry ah Principal Investigator ni lai a ni a, WHO in cancer research buaipui tura a din, International Agency for Research on Cancer ( IARC), Lyon te nen research ti ho mekin an research hi chhulhmawr ( cervix) cancer venna tura pawimawh leh țha HPV Vaccine chungchang a ni a; research paper pawimawh tak tak an publish tawh a, chung an hmuhchhuah zingah chuan HPV Vaccine hi vawithum pek țhin chu vawihnih a țha tawk e tih niin khawvel ram zawng zawngin HPV Vaccine hi vawihnih an pek phah tawh a ni. Tunah pawh hian IARC te nena an thawhhona research findings chu presentation neih a ni dawn a, hei vang hian IARC hian sawm ve in a senso pawh an tum sak vek a ni.