79/2022-2023
Champhai, the 7th April, 2022: Champhai Fire Station leh DIPRO Office Champhai tangkawp chuan vawiin khan media mi leh sate tan kangmei laka himna leh inven dan inzirtirna chu ‘Special Training on Fire Safety and Fire Prevention’ tih thupui hmangin an buatsaih.

He hun I&PR Conference Hall-a neih hi DIPRO Champhai Dr.Lallawmkima chuan a kaihruai a. Kangmei laka himna leh inven dan chungchang inzirtirna media mite tana buatsaih a ni thei chu lawmawm a tih thu sawiin, kangmei hluar hun chhung ngeia inzirtirna zau zawk neih a tul thu thu a sawi a. An thil zir leh hriatte zau zawka mipuite zirtir chhawngtu ni thei tura training hlawkthlak tak hmang theuh turin kalkhawmte duhsakna a hlan a ni.

Zirtirna petu Pu F.Lalchhandama, Station Officer, Champhai Fire Station chuan kangmei laka himna leh ven dan kawnga zawm tur hrang hrangte a sawi bakah kangmei chhuah thulha chetlak dan tur leh tih loh turte a sawifiah a. Kangmei chhuah atanga a hma thei ang bera Fire Station hriattir vat thin a tul thu leh a pan dan tur thlenga kawhhmuh a tul thu sawiin, a tirtea inhrilhhriat loh leh minute hnih khat leka tlai hian chhiatna nasa zawk a thleng hman thin a ni, a ti a. Kang thelhtute mipui lamin ruahmanna an lo siampui vat vat a tul thin thu leh thlalak ngawt buaipui lova rilru fim hmanga thawktute puihbawm nachang hriat a hun tawh takzet thu sawiin, tui lak dan tur, tul lova lirthei chevel khuahkhirh leh insenghawi dan tur chungchang ngaihtuaha ruahmanna siam a pawimawh a, tangkaina nei lemlo kang thelhtute chetvelna tibuai theite tan tel ve kher a tul lo a ni, a ti. Mihring nunna a hlut ber avangin kangmei a nasat hle tawh hnuah bungrua chuh turin inkanga tlan luh loh a him thu a sawi a. Kangmei a chhuahin Champhai Fire Station biakpawh theihna Phone number: 03831-234026 emaw, 7628029288 ah te hriattir vat thin turin Station Officer chuan mipuite a ngen a ni.

Pu Lalhlupuia, Vice President, MJA Champhai District chuan kangmei laka himna leh inven dan inzirtirna mipui hnenah a theih leh remchan dan anga an kalpui thin thu sawiin, media-te tana training buatsaih chu tangkai taka hman an tum thu a sawi a. Lawmthu sawiin training hi a khar a ni.

He hunah hian kang thelhna hmanrua Fire Extinguisher hman dan te, hliam sawngbawl leh insaseng kawnga tangkai turte ataka entir a nih bakah chetlakna kawnga pawimawh hrang hrangte inzirtirna neih a ni a. Zawhna leh chhanna hunte neih a ni bawk a. Kang thelh nana pawimawh tak tui awlsam zawka lak a nih theih nana hmalak tul te, chhiatna thlen thulha mumal zawka chetlak a nih theih nan Disaster Management Plan leh Quick Response Team/Fire Safety Management Team mumal tak neih a pawimawh ziate sawiho a ni a. Tul miah lova kang thelhtute tibuai thei tur ang zawnga kang chhuak miahlo kangmei chhuak awm anga Fire Station hriattir ‘false report/hoax call’ titute lakah dan hmanga hremna lekkawh a nih theih thu leh thla thum chhung lungin tan leh lei Rs. 5,000/- thlenga chawi emaw, a pahniha chawikawp theih a nih thu tarlan a ni bawk.

Station Officer, Champhai Fire Station tarlan danin sawrkar kum kalta April ni 1, 2021 atanga March ni 31, 2022 chhung khan Champhaiah in 7, chhungkaw 12 te luah leh Kudam 1 a kangral a, kangmei chhuak avangin in 2 te thiah a ni bawk a, thil kang hlut zawng hi cheng nuai 1,711 hu vela chhut a ni. Champhai Fire Station chuan April ni 14 tanga ni 20 chhung hian ‘I neihsa a lo pun zual theih nan kangmei laka fimkhur zir ang che’ tih thupui hmangin Fire Service Week 2022 an hmang dawn a, hemi hun chhung hian kang thelhtu nunna chante sunna, kangmei lak himna tura hmalakna endik, kangmei chhuah thulha chetlak dan tur nunchan zir, inzirtirna lam hawia hmalakna leh inkawmhona hunte buatsaih tum a ni.