Vawiin chawhnu khan District Level Committee on Fire Prevention buatsaihin Kangmei ven kawnga inzirtirna leh inrawnkhawmna hun DIET Champhaiah neih a ni.

He hun hi Pu R.L Thianghlima, Principal DIET Champhai chuan   kaihruaiin,  kangmei ven kawnga inrawnkhawmna leh inzirtirna hun hmang tura kalkhawmte chu kangmei ven kawnga theihtawp chuah theuh tura intiamkamna a neih tir a,  kangmei ven kawnga tan la sauh sauh turin a fuih a ni. 

Pu C.Lalbiaka, DFO Champhai leh Member Secretary, District Level Committee on Fire Prevention chuan kalkhawmte hnenah kangmei chhuah chhan leh a nghawng hrang hrangte presentation hmangin a tarlang a. Kang mei ven hapta   chu Mizoramah kum 2000 atanga hman tan anih thu leh kumin pawhin February Ni 11 atanga 16 chhunga hman tum a ni, a ti a.  Ram kang  ven kawngah uar leh zuala zirtirna neih angaih thu sawiin, tun ang zela ram kang a tam chuan nakin lawkah ram chereu leh chhawrtlak loh tam tak kan neih  phah dawn a ni, a ti a. Champhai DFO chuan kalkhawmte chu  kangmei ven kawnga  hriattur tul ang angte chu tha taka ngaithla a, midangte zirtir chhawngtu nih tum theuh turin a chah a ni.

Vawiin inrawnkhawmna hunah hian kalkhawmte’n chak leh awmze nei zawka ram kang ven anih theihna tura hmalakna turte an sawi a. Heng bakah hian Sawrkar, NGO, VC, Zirna In leh mipuite tihtur leh mawhphurhnate  chipchiar taka sawiho a ni.

Environment and Forest & Climate Change Department tarlan dan chuan Champhai District hi Mizoram District 8 zinga Forest Cover nei zim ber dawttu niin, District zau zawng za zela  81.73  hi Forest Cover a ni a,  Mizoram pumpui a Forest Cover hi  za zela 86.27 a ni. Ramngaw  chhah (Very Dense Forest) erawh chu District zingah a sang ber a, za zela 56 niin,  hei hi Wildlife Sanctuary & National Park  pahnih a awm vang a ni. 

Mizoramah hian thal rei lo te chhung hian kan fimkhur loh avangin  ram hi nasa takin kan ti kang thin a, India State zinga ram ti kang nasa ber niin, kum tinin Hectare 1200 (Tin 3000 hmun) vel   ram a kang ziah anga chhut a ni. North East region a ram kang hmun thuma then a hmun hnih  dawn hi Mizoram chhunga thleng a ni a, ram kan chhan bulpui ber chu   thingtlang loneih (Shifting cultivation) leh tul loa ram tihkan vangte niin,   Forest Survey of India in a record dan chuan kum 2015-2017 inkarah Mizoram Ramngaw hi Square Kilometre 531  vel zetin a kiam a  ni. Hemi hun chhung vek hian Champhai District chhungah Forest cover hi Square Kilometre 78 (Tin 20,000 hmun vel)  in a kiam ve bawka chhut a ni.

Vawiin programmeah hian SCERT leh DIET Champhai tangkawp buatsaih District Level Essay Writing Compettition neih taka tithate hnenah lawmman Pawisa fai leh Citation hlanna neih a ni a. Lawmman pakhatna dawngtu chu Alfred Ramchanhlua, Class X, Govt. GM High School, Champhai a ni a. Pahnihna chu Vanlaltlana, Class X, PES Zotlang niin, Lawmman pathumna dawngtu chu Abigail Liansiami, Holy Cross School, Champhai te an ni a, heng bakah hian mi pangate hnenah Consolation Prize pek an ni bawk.

Vawiin inrawnkhawmna hunah hian Enivironment Forest & Climate Change Department-a thawktute, DIET Champhai zirtirtu leh zirlaite, High School leh Higher Secondary School zirlaite, Science & Environment Committee, Sub Hqtrs YMA, Champhai  Nature Conservancy (CNC), AMFU Champhai leh YMA Zotlang Branch hruaitute an tel a ni.