Vawiin tlai khan Kayakalp Award Ceremony, 2018-19 (Damdawi In Hmasawnna Lawmman Semna) chu Civil Hospital Conference Hall, Aizawl-ah neih a ni. Kayakalp Award Ceremony-ah hian Social Welfare, Excise & Narcotics Minister, Dr. K.Beichhua chu khuallian niin, Award semna hun a hmang bawk a ni.
Khuallian Dr. K.Beichhua chuan khuallian a ni chu lawmawm, a ti a. Kayakalp chu insiam tharna niin, Mizoram pawhin a hlawkpui a, thianghlimna ngaisang leh duh kan nih avangin Kayakalp hi Mizoram atanga chhuak ni awm hial zawk a ni, a ti a. Kayakalp chu India ram chhunga mipuiin Damdawi In tam zawk an pan theihna tur te, sum sen a tlem theih zawkna tur te, a thianghlim zawkna tura ruahmanna leh hmalakna a ni, a ti a. Minister chuan India ram huapa Aizawl Civil Hospital-in National Quality Assurance Standards Accredited (NQAS) Certified Status a hmuh theih chhan chu thahnemngai taka doctor, nurse leh thawktu dangte thawh vang a ni, tiin a sawi a. Ram tana thawk, hmingthatna pawh zawnglo, a li thuk lam zawnga lut te chu fakawm, a ti a. Mizoram state tana tangkai tur leh hmasawnna te thur chhuak zel turin thawktute zawng zawng a sawm a ni.
Most Improved District Hospital Award chu Siaha District Hospital hlan a ni a, Most Beautiful Hospital Award chu Lawngtlai District Hospital hlan a ni bawk a. Most Improved Community Health Centre (CHC) atan Thenzawl CHC thlan a ni a, Most Beautiful CHC chu Sakawrdai CHC a ni. Urban Primary Health Centre (PHC) zingah Most Inspiring Award chu Sazaikawn PHC (Lunglei District) hlan a ni a, Most Beautiful Award chu ITI PHC (Aizawl District) hlan a ni bawk.
He huna lokal te hi Health Mission Director, Dr. Rozama chuan lo dawngsawngin, State Nodal Officer, QA, Dr. R.Lalchhuanawma chuan Kayakalp Award Report a pe a. District Hospital atanga Award dawngtute’n Kayakalp thatna leh mipuia nghawng a neih te an sawi bawk a ni.
Kayakalp Award hi Kum 2015 atanga sawrkar laipui hmalaknaa sem tan a ni a. Kayakalp hi India ram hmun hrang hranga sawrkar Damdawi In te’n faina kawnga hma an sawm theih nan leh Damdawi In mawina tura hmalakna a ni a. NQAS Accredited Certification hian Cheng Nuai 30 a keng tel a, NQAS Accredited tur hian tehna chi hrang hrang 100-ah 70 hmuh a ngai a, hamthatna hrang hrang a keng tel bawk a ni.
