1015/2022-2023
Champhai, the 23rd June, 2022: Chawlhkar hnih chhung awh tur Kawthalo hri (Diarrhoea) do beihpui thlakna, 'Intensified Diarrhoea Control Fortnight (IDCF)', June ni 23 atanga July ni 7, 2022 chhunga kalpui tur chu ram chhung hmun dangte rualin 'Zero Child Death due to Diarrhoea/ Kawthalo avanga thihna naupangah a awm tawh loh nan' tih thupui hmangin Champhai District-ah kalpui tan a ni. A hawnna hun vawiin chawhma dar 11:00 a District Hospital OPD a neih chu Bawrhsap Pu James Lalrinchhana chuan a hmanpui a, naupang kum 5 hnuailamte hnenah ORS packet khat zela semin kar hnih chhung awh tur kawthalo hri do beihpui thlak chu a hawng a ni.

Pu James Lalrinchhana chuan naupang kum 5 hnuailam suattu lian berte zinga mi kawthalo do beihpui thlak tan a ni chu lawmawm tiin ngaihpawimawh a ngaih takzet thu a sawi a. Fur ruahtui tlak tam hunlai a nih chhoh tak avangin kawthalo hri a tam a, hemi avanga naupang thihna a thlen loh nana tanlak a tul thu sawiin, hemi hun chhunga health department thawktute zirtirna pekte ngaihpawimawh turin mipuite a chah a. Kawthalo leh hridangte umbo a nih theih nan department pakhat chauh nilo, a kaihhnawih department dangte nen tha taka thawhho a tul a, inpek tharna kan neih a ngai a ni, a ti a. Hriselna kawnga health department hnuaia hmalakna hrang hrangte chak zawka kalpui a nih theih nan kan zavaia kan tanrual a ngaih thu sawiin, department mala kal thei kan awm lova hemi tluk zet hian a hlawhtlinna mipuite kutah a innghat tlat a ni, a ti bawk.

Bawrhsap chuan faina kawnga hmalakna chu hrisel tura bultanna pawimawh tak a nih thu sawiin, mipuite chu faina dah pawimawh hmasa fo thin turin a chah a. Health department hnuaia hriselna kawnga thawktute hnathawh chu zahawm a tih thu tarlangin, theihtawp chhuaha thawk chhunzawm zel turin a chah a. Mipuite pawh zah tak chunga an hmalaknate thlawp tlat a, an thute tha taka zawm turin a sawm nghal bawk a ni.

He hunah hian Dr. Biakthansangi, Paediatrician, District Hospital, Champhai chuan naupangin kawthalo leh luak an neih a buaipui dan tur a sawifiah a. Naupangin kawthalo leh luak an neih veleh taksa atanga tuiril chhuakte phuhruk nan ORS pek tan nghal a tul thu leh, thla ruk tlin hma pawhin an kua a that loh chuan pek a that thu a sawi a. ORS chauh nilo ril tuamtu inhliam siam chak nan Zinc pawh pek tel angaih thu sawiin, a pahniha kalkawp tir angaih thu a sawi a. Mipuite chu mithiamten an siam nilo ORS lem hmang lo tur leh ORS nilo theitui dang pe lo turin a chah a. A nih dan tur ang thlapa kut silfai ngaihpawimawh a tul thu leh kawthalo leh luak neih nasat avanga damdawiin pan chhante a tarlang bawk a. Kalkhawmte chu ORS pawimawhzia leh tangkai taka hman a nih tawh dante hrilhin, midangte zirtir chhawngtu nih theuh tum turin a chah a ni.

Hemi hun chhung hian ASHA ten naupang kum nga hnuai lam awmna in zawng zawng tlawhchhuakin ORS an sem dawn a. Hemi hmalakna kaltlang hian Champhai District-a naupang kum 5 hnuailam 13,500 chuangte hnenah a thlawna ORS sem tum a ni a. Kawthalo an awmin Zinc pektel a ni dawn a, hemi rual hian faina leh thianghlimna chungchangte, kawthalo enkawl dan leh damdawi in pan a tul hunte hrilhin ORS siam dan leh kutsil dan dik an zirtir bawk ang. Heng bakah hian Champhai District chhung hmun hrang hranga Damdawi in, Health Sub-Centre leh Anganwadi Centre-ahte a duh leh mamawh apiangten a thlawna an lak theih turin Zinc-ORS Corner siam vek a ni bawk ang.

Intensified Diarrhoea Control Fortnight (IDCF) hi India ram pumah kum 2014 khan hman tan a ni a. Naupang kum 5 hnuai lamte thlurbing niin, kawthalo avanga thi an tlem theih nan beihpui thlak thin a ni a. He natna avang hian ram pumah kum khat chhungin naupang kum 5 hnuai lam nuai 1 chuang vel an thi ziah anga chhinchhiah a ni.

He hun hi Dr. R.Lianmawia, Chief Medical Officer (CMO) Champhai chuan a kaihruai a. Dr. Zatluanga, District Medical Superintendent (DMS) Champhaiin lawmthu sawiin hun a khar a. Line Department hotuten he hun hi an telpui bawk a ni.