2942/2022-2023
Champhai, the 5th December, 2022: Sawrkar hmalaknaa AMC area leh District Hqrs. huam chhunga kawtkaia eirawngbawlna gas (LPG) sem hna LPG Online Refill Booking & Home Delivery, Champhai Town Area-a December thla tir atanga kalpui tura tih bawhzuiin tukin khan Champhai khawpui chhunga pilot project neihna tura ruat veng pahnih zinga pakhat Keifangtlangah gas home delivery kalpui tan a ni. LPG Home Delivery kalpui tan hi Pu C. Lalngura, President, Champhai District Consumer Associaition chuan MIZOFED Pisa tual atangin a vailiam a ni.

Pu C. Lalngura, President Champhai District Consumer Association chuan sawrkar laipuiin gas home delivery kalpui tura a tih angin Champhaiah Mizoram sawrkar hmalaknaa Gas Home Delivery kalpui tan tur chu lawmawm tiin, Gas Home Delivery tur phur lirthei a vailiam a ni.

Pu H. Lalrozela, Manager, MIZOFED Champhai chuan Aizawlah kum 2019 atangin veng thlan bikah an kalpui tan tawh tih a sawi a. Champhaiah pawh Mizoram Sawrkar hmalaknain Gas Delivery hi kalpui tan a nih thu a sawi a. Venglai leh Keifangtlang chu pilot project a neih hmasak tura tih niin, a enchhinna atan Keifangtlangah bultan a nih tur thu leh hemi hnu hian veng hrang hrangah kalpui anih tur thu a sawi.

Gas Home Delivery hi tukin khan Keifangtlangah kalpui niin District Bawrhsap Pu James Lalrinchhana chuan LPG Home Delivery kalpuina hmasa bera thawkchhuakte a lo dawngsawng a. Hmalakna kawnga pawimawh leh tul dangte a sawipui a, theihtawp chhuah chhunzawm zel turin a chah a ni.

Kawtkaia eirawngbawlna gas sem hna hi Champhaiah chuan Gas Agency MIZOFED Champhai chuan an kalpui a. Home Delivery tih nana phone hmanga Gas chah dan leh document felfai vawn a tul thu leh siam dante inhrilhhriat pah zel a ni a. Tun dinhmunah Gas sem turah harsatna a awm loh thu leh home delivery kalpui mek kawnga harsatna neite tan zawhfiah reng theih an nih thu an sawi a ni.

Gas man hi Rs. 1,205/- a ni a, heng bakah hian home delivery charge Rs.70/- aia tam lo pek a ngai a, avaiin Rs.1,275/- sen a ngai a ni.