Vawiin chawhma dar 11 khan DC Conference Hall, Keifangtlangah Champhai District Bawrhsap Pu Vanlalngaihsaka hovin boruak muanawm tak hnuaia Krismas leh Kum thar Champhai mipui ten an hman theih nan Dan leh Thupek chungchangah meeting neih a ni.

DC Pu Vanlalngaihsaka chuan Krismas leh Kum thar felfai taka hman a nih theih nan theih tawp chhuah turin kalkhawmte chu a sawm a. Hunpui laia boruak muanawm leh tha tak a awm theih nan sawrkar lama hotute, mipui leh khawtlang hruaitute chu thawhho puiah a sawm a ni.

Meeting chuan kum danga lo tih thin tawh angin Sub-Headquarter hnuaia YMA Branch 25 te chu mahni huam chhung theuha duty insiam leh nise tha a ti a. Excise and Narcotics Department-te hmalaknain  ruihhlo do Special Drive neih ni leh se tih a ni a. Meeting chuan  No tolerance khauh taka kalpui leh nise; a bik takin krismas hma December ni 22 atanga 24 ah te beih ngawrh leh zual nise a ti a. Home Minister thuchhuah bawhzuiin halpuah/halmawi leh silai lem mu nei hman, zawrh, kawl reng reng khap tlat nise, thu pek zawmlote chu case siam zel nise tiin a rel a. VC te chu an huamchhung theuha khapna thupek lo puangzar zel tura ngen nise a ti a.

Heng bakah hian Hunpui chhunga kawngpui tha, eng leh tui hnianghnar zawk awm theih nan   PWD, P&E leh PHE Department ten hma la se tih a ni a. Lirthei veivak lo ziawm zawk nana tan la tura Traffic Police lamte ngen nise tih a ni a. Darthangvunga Point atanga Selluaia Point inkar chu December ni 18 atanga 23 leh December 29 atanga 30 chhunga No parking Zone a siam nise heng bakah hian Chalchung Run bul kawngkama lirthei dah phal tawh loh nise tih a ni a.

Fire Brigade-te engtiklai pawha che chhuak thei tura inralring reng tura tih nise, Hospital lama thawktute pawh hunpui laia intipalh an tam thin avanga duty tha tak indah tura ngen nise ti a rel a ni a. Faina kawngah inthlahdah phah lova hunpui lai pawha hmalak zel nise tih a ni a. Mamawh huna biakpawh mai theih turin Police, Excise, Traffic leh YMA-te biakpawhna tur number TV Scroll lama tihlan theih nise ti a rel a ni bawk a ni.

Vawiin meeting-ah hian dan leh thupek kengkawhtu lam department hrang hrangte, tlawmngai pawl hrang hrang leh khawtlang hruaitute an kal khawm a ni.