2843/2024-2025
Champhai, 5th November 2024: Vawiin khan DC Conference Hall-ah Champhai Bawrhsap Pu VL Remliana kaihhruaiin Krismas leh Kumthar vuakveta Champhai District chhunga dan leh thupek kenkawh dan tur sawiho a ni a. He hunah hian SP, DUDO, RD, C&I, I&PR, VC, MJA aiawhte leh tlawmngai pawl hruaitute an tel a ni.
Champhai Bawrhsap Pu VL Remliana chuan kalkhawmte inlawmna thu sawiin, kum 2024 Krismas leh kum 2025 Kumthar vuakveta Champhai District mipui ten thlamuang taka hun an hman theih nan ngaihtuahna seng turin kalkhawmte a sawm a ni.
Champhai SP Pu Shivendu Bhushan pawhin he hunah hian dan leh thupek kenkawh kawngah Police ten mipuite thlawpna leh thawhpuina an mamawh tih a sawi a. Champhai District chhunga dan bawhchhiatna thleng te chu phone number (+91) 6909316462 / 6909316463 ah te Whatsapp hmanga thlen turin mipuite a ngen a, darkar 6 chhungin hma an lak nghal ṭhin tur thu a sawi a ni. Pu Shivendu Bhushan hian kumtlinglo motor khalh leh dan phal baka exhaust ring vuah te lakah khauh zawkin hmalak a nih tur thu a sawi bawk.
Vawiin thutkhawma thurel tlangpui te chu :
1. Krismas leh Kumthar vuakveta Champhai khawpui kawng sira inpho duh (hawkers/ vendor) te tan ruahmanna siam a ni a. Village Council ten an huamchhunga inphona hmun remchang te an lo thliar fel ang a, inpho dilna pawh an hnenah hian thehluh tur a ni. VC te ruahmanna hi Bawrhsap kaihhruai Town Vending Committee in a enpui leh ang.
2. Krismas leh Kumthar vuakveta mipui bazar te an him zawk nan, Awmpui Pheiah ‘No Vehicle Zone’ December ni 21,23 leh 24 chawhma dar 10:00 aṭanga chawhnu dar 04:00 thleng neih tur a ni.
3. Halpuah Hal khap chungchang: Mizoram sawrkar thupek angin halpuah leh halmawi, boruak tichhe thei chi reng reng khap a ni a. Bawrhsapin thupek a tichhuak dawn bawk a ni.
4. Duty leh Help Desk: Champhai khawpui Bazar hmunah Champhai DEF ten mipui ṭanpui ngai te tan ‘Help Desk’ an ruahman dawn a. Khaw tina VC leh YMA te pawhin a rem danin Duty Post leh Help Desk an siam ang.
5. Kum tling lo lirthei khalh leh Two Wheeler Exhaust: Hunpui lo thleng tura mipuite an him zawk nan District Transport Office leh District Executive Force ten kum tling lo lirthei khalh leh Two Wheeler Exhaust phal chin baka bengchheng te lakah khauh zawkin hma an la dawn a ni.
6. Naupang kum tling lo te suahsualna laka an him theih nan VC leh YMA ten an huamchhung ṭheuhah hma an dawn a. Ruihhlo nasa zawka do dan tur pawh he hunah hian sawiho a ni bawk.
