2844/2024-2025
Dated Aizawl, the 5th November, 2024: Vawiin khan Irrigation & Water Resources Auditorium, MINECO ah Chief Minister Pu Lalduhoma chuan mipuiten Land Revenue & Settlement department te awlsam taka an dawr theihna tur online service portal, e-ram ti a vuah (Development of Comprehensive & Integrated GIS based System for Maintenance and Management of Land Records in Mizoram portal) chu a hawng. Pu B. Lalchhanzova, Minister, Land Revenue & Settlement chu khualzahawm a ni.
He e-ram portal hi Ministry of DoNER, Science & Technology Section fund Rs. 6.4 Crore atanga thawh niin, a bul tan nan hian pilot project angin Aizawl district hnuaia land records leh process te kalpui phawt a ni ang. In hmun dilna, periodical patta, land lease, house site leh hming thlaktea bul tan a ni ang a. A tahtawlin Revenue Department service 27 te chu he portal-ah hian bilh tel vek tura ruahman a ni. A portal address chu eram.mizoram.gov.in a ni a, a hmang thiam lo te tan Common Service Centre (CSC) kal tlanga hman theih a ni.
Thu a sawinaah Chief Minister chuan, sawrkar leh mipuite inkara indawrna awlsam zawk, hun leh tha heh lo zawk, rang zawk leh huapzo zawk neih kan duh a, chu chu kalphung thar mipui sawrkar zia a ni. Sawrkarna kan chelh niin Right to Public Services Act chu tha zawka kalpui tur leh chumi kaltlanga service tam zawk pe turin kan intiam a. Ni za chhungin kan tihlawhtling a. Mipuiten an lungawi lohna an thlen zung zungna tur Public Grievances & Redressal portal changkang tak - Mipui Aw thar pawh kan hawng bawk. Hun a lokal leh deuhva, Sustainable Development Goals Dashboard leh Project Monitoring Committee Dashboard kan hawng leh a. Vawiinah mipuite dawr nasat em em Revenue hmalakna tichaka tiawlsamtu tur e-ram kan hawng leh ta a ni.
Revenue Minister tha tak kan neih zarah hun reilote chhungin hmasawnna sawi tur kan nei nual mai. Tunhmaa House Pass dil apiangten Revenue Minister dawhkan a paltlang ngai thin kha tihtawp a ni a. Aizawl district Settlement Office chu mipuite mamawhna avangin Aizawl North leh Aizawl South ah then a ni dawn a, Revenue thubuai tam takte rang zawka ngaihtuahtu tur Revenue Court kan siam dawn a, surveyor indaih lohna avanga kan harsatna sutkian nan empanel survey firms system kan kalpui dawn. Hengte hi Notification tihchhuah vek tawh an ni. Tin, vawiina kan hawn computerisation of land records hi kan mamawh avangin ka lo tlangaupui ve tawh thin a. Kan sawrkar veleh chak takin hma kan la nghal a, hun reilote chhungin kan lo hawng thei ta. Vawiinah hian kan ram chuan pen khat dangin hma kan sawn a ni, a ti a. e-ram a puitlin theih nana thawktute zawng zawng chungah lawmthu a sawi a ni.
Pu B. Lalchhanzova, Minister, Land Revenue & Settlement pawhin thusawiin, he hmalakna hi Ministry hmasain bul a lo tan tawh a. Kan theih ang angin kan umzui a, siam that chhoh zel ngai tam tak a la awm ang tih hre chungin kan hawng ta phawt a ni, a ti.
e-ram hawnna inkhawm hi Pu Vanlalmawia, Secretary, Land Revenue & Settlement chuan a kaihruai a, Pu V. Lalduhzuala, Director-in technical report a pe a. Lailen Consultancy lamin a portal hnathawh dan sawifiahna an nei a ni.
A hawnna inkhawmah hian Dr. Lorraine Lalpekliana Chinzah, Adviser to CM, Dr. Kenneth Chawngliana, VC, MSPB, Dr KC Lalmalsawmzauva Adviser to CM, Pu H. Ginzalal, Adviser to CM, Pu W. Chhuanawma, Govt. Deputy Chief Whip, Pu Lalchhuanthanga, MLA, Pu V L Zaithanzama, MLA, Pu K. Laldawngliana, MLA, Pu K. Hrahmo, MLA, Pu Longki Pongcho, Member NEC leh official pawimawh tak tak te an tel a ni.
