Vawiin chawhma dar 10 khan Champhai DC Conference Hall, Keifangtlangah kumin MLA inthlanpui atana Election Notice chu Mizoram Governor-in Notice of Election a chhuah hnuah Champhai District chhunga RO pangate chuan an bial theuh tan form 1 hmangin an tichhuak a ni.

Vawiin atanga November Ni 9, 2018 thlengin Public Holiday tiam lovin nitin chawhma dar 11 atanga tlai lam 3 thleng RO emaw, ARO hnenah  nomination a file theih dawn a. Notice of Election-in a tarlan dan anga inthlan kalpui dan tur chu a hnuaia tarlan ang hi a ni.

1.     Gazette Notification chhuah ni                      :   2.11.2018 (Friday)

2.     Nomination thehluh theih tawp ber ni           :   9.11.2018  (Friday)

3.     Nomination endikna (Scrutiny) tur hun        :   12.11.2018 ( Monday)

4.     Candidate inhnuhdawh theih tawp ber ni     :   14.11.2018 (Wednesday)

5.     Vote thlak ni                                                 :   28.11.2018 (Wednesday)

6.     Vote chhiar ni                                               :   11.12.2018(Tuesday)

7.     Inthlan kaihhnawih zawh fel vek hun tur        :     December Ni 13, 2018 hma

Vawiin Notice of Election puan ni hian Champhai District chhunga Assembly Constituency 5 awm atangin Returning Officer (RO) leh Assistant Returning Officer (ARO) te leh Chanchinbumite an tel a. 21-Lengteng A/C-ah Pi Ethel Rothangpuii, PD, DRDA Champhai chu RO niin Pi Lalhruaitluangi, SDO (C) Ngopa chu ARO a ni a. 22-Tuichang A/C-ah Pu K.Vanlalthiana, Addl. DC Champhai chu RO niin Pu Lalremruata Sailo, BDO Khawzawl chu ARO a ni a. 23-Champhai North ah Pi Ethel Rothangpuii, PD,DRDA Champhai chu RO niin Pi Rebecca Laldinmawii Hrahsel, BDO Champhai chu ARO a ni a. 24-Champhai South A/C atan Dr.Naveen Aggarwal, DC Champhai chu RO niin Pu K.Lalhmuakliana, DUDO Champhai chu ARO a ni a. 25-East Tuipui A/C atan Pu Abraham Beirazi Khithie, SDO (S) Champhai chu RO niin Pu Vanlalchhuanliana, BDO Khawbung chu ARO a ni.

Kumin inthlan tana Second Special Summary Revision of Photo Electoral Roll neih zawh takin a tarlan dan chuan Champhai District chhungah General Voter 84,899 leh Service Voter 613 an awm mek a, avaiin Vote nei mi 85,512 an awm a. General Voter zingah Mipa vote thlak thei 41,979 awmin Hmeichhia vote thlak thei mi 42,920 an awm bawk a, Mipa vote aia hmeichhe vote tam zawkna hi  941 a ni. Service Voter 613 zinga 611 mipa niin a bak 2 chu Hmeichhe Voter an ni a. District chhungah  Polling Station 137 awmin, Polling Station 1 ah voter 620 awm zel ang a ni a. MLA Constituency zingah 23-Champhai North-ah voter 18,520 awmin a tam ber a, 25-E. Tuipui-ah voter 14,956 awmin vote nei awm tlemna ber a ni.

Kumin hian Champhai District inthlan endik tur atan Expenditure Observer 1, General Observer 2 leh Police Observer 1 rawn kal tura beisei an nih bakah State pum atana rualbanlote PWD puala endiktu 1 a awm  beisei ani bawk. Inthlan kaihhnawih duty leh team hrang hrangte pawhin vawiin lam atang chuan chak leh zualin  hma an la zel bawk a ni. 

Hriat theih chianah vawiin chawhnu dar 3 thleng khan mi 4 ten intiamkamna la leh secutity deposit Rs 5000/- thehlutin nomination an file a, chungte chu; Pu R.Ramthanmawia (MNF), 25-East Tuipui A/C; Pu C.Lalremliana (ZPM), 24-Champhai South A/C; Pu W.Chhuanawma (ZPM), 22-Tuichang A/C; Er Ginzalal (Laltea) ZPM, 21-Lengteng A/C leh Pu C.Chhawnthanga (ZPM), 23-Champhai North A/C te an ni.